ABŞ-ın qlobal investisiya bankı "Goldman Sachs" təbii qaz qiymətləri ilə bağlı proqnozunu yuxarı istiqamətdə yeniləyib.
İranın zərbələri səbəbindən Körfəzin biznes dairələri çətin vəziyyətə düşüb
FED.az biznes və maliyyə xəbərləri portalı xəbər verir ki, bank 2026-cı ilin aprel ayı üzrə təbii qaz fyuçersləri üçün qiymət proqnozunu Qətərdən LNG (mayeləşdirilmiş qaz) daşımalarında yaranan fasilələr fonunda 1 MVsaat üçün 36 avrodan 55 avroya qaldırıb. Bununla da proqnoz təxminən 53% artırılıb.
Qeyd edək ki, Londonun Intercontinental Exchange (ICE) birjasında təbii qaz qiymətləri MVt·saat üçün avro ilə təqdim olunur.
Qətərin dövlət enerji şirkəti "QatarEnergy" Ras Laffan və Mesaieed şəhərlərində yerləşən mayeləşdirilmiş təbii qaz (LNG) zavodlarında istehsalı dayandırıb. Həmin obyektlər qlobal LNG təchizatının təxminən 20%-ni təmin edir. Bildirilir ki, istehsal müəssisədə su çənini hədəf alan pilotsuz uçuş aparatı hücumundan sonra dayandırılıb.
Qətərdən tədarükün kəsilməsi Avropa İttifaqının LNG idxalının təxminən 15%-ni risk altına salır. Qlobal LNG bazarında onsuz da məhdud olan təklif şəraiti bu hadisə ilə daha da gərginləşib və Avropanın ABŞ mənşəli LNG yükləri üçün daha yüksək qiymət təklif etməli ola biləcəyi qeyd olunur.
Digər tərəfdən, LNG daşıyan gəmilərin Hörmüz boğazı vasitəsilə keçidi dayandırması Yaxın Şərqdəki digər mühüm qaz istehsalçılarından da tədarükü məhdudlaşdırıb. Regionda təhlükəsizlik risklərinin artması enerji ticarətində logistika problemlərini dərinləşdirir.
Təklif tərəfdəki bu risklər Avropada nisbətən aşağı qaz anbarı səviyyələri ilə birlikdə qiymətlərə təzyiqi artırıb. Avropa İttifaqında qaz anbarlarının doluluq səviyyəsi hazırda 31%-dən aşağıdır. Bu göstərici ötən ilin eyni dövründə təxminən 40% idi.
Bundan əvvəl Qətərin dövlət neft-qaz şirkəti QatarEnergy İranın hava zərbələri ilə əlaqədar LNG və əlaqəli məhsulların istehsalını dayandırdığını elan edib. Bu fonunda Avropada qaz kotirovkaları 1 000 kubmetr üçün 590 ABŞ dollarını ötüb. (Marja)
