Azərbaycanda böyük qaz pulu olan biznes obyektlərinin, o cümlədən istixanaların («parnik»lərin) qaz pulu borcunu ödəməsi üçün yeni üsuldan istifadə edilir.
Eləcə də bax: Şəmkirdəki «parniklər» qaz pulunu – TAM ÖDƏMƏYİBLƏR
«2020-ci il üzrə istixana fəaliyyəti ilə məşğul olan sahibkarlar növbəti isitmə mövsümü yaxınlaşdıqca borclarının ödənilməsini həyata keçirirlər».
FED.az xəbər verir bu barədə «Azəriqaz» İB-nin yaydığı məlumatda qeyd olunub. Bildirilib ki, debitor borcun ödənilməsi haqqında «Razılaşma protokolu» tərtib olunaraq, cari istehlakla bərabər ötən isitmə mövsümü ərzində yaranmış borcun hissə-hissə ödənilməsinə imkan yaradılır. Belə anlaşma üçün müraciət edən sahibkarların sayı getdikcə artır:
«Borcların ödənilməsi üzrə ən çox problemli hallarla rastlaşılan Şəmkir Regional qaz istismarı İdarəsinin xidmət sahəsinə daxil olan rayonlarda fəaliyyət göstərən istixana sahibləri oktyabr ayının birinə olan məlumata görə ümumilikdə 9 milyon manata yaxın borcdan təqribən 800 min manata yaxın olan məbləğin ödənilməsini təmin ediblər. Bu da qısa vaxt üçün, yəni «Azəriqaz» İB təqribən bir ay bundan öncə onlara etdiyi müraciətdən sonra normal göstəricidir. Hətta onların arasında 248 000, 213 000 min manatlıq borcunu tam ödəyənlər də var. Digərləri isə borclarının bir qismini (98 000, 58 000, 95 000 manat və s. həcmdə) ödəməklə yerdə qalan məbləğin digər hissəsinin «Razılaşma protokolu» tərtib olunmaqla 2020-ci il dekabr ayının birinədək hissə-hissə ödənilməsinə dair öhdəlik götürüblər. Həm borcunu tam, həm də hissə-hissə ödəyən istixana sahiblərinin təsərrüfatlarına qaz açılışı tam təmin edilməkdədir».
Hazırda Bakı Regional Qaz İstismarı Departamentinin xidməti ərazisində fəaliyyət göstərən 227 istixana sahibkarlıq subyektinin istifadə edilən qaza görə ödənişləri 94,6 % təşkil edir. Şəmkir Regional qaz istismarı İdarəsinin xidməti ərazisində fəaliyyət göstərən 210 istixana sahibkarlıq subyektinin ödənişləri 73,9 % təşkil edir. Salyan Regional qaz istismarı İdarəsinin xidməti ərazisində fəaliyyət göstərən 254 istixana sahibkarlıq subyektinin ödənişləri 92,7 % təşkil edir.
Ümumilikdə, respublika üzrə istixana sahəsində fəaliyyət göstərən sahibkarların ödənişləri 89,0 %-ə bərabərdir».
