İsmayıl Dadaşov 1 fevral 2024-cü il tarixindən etibarən GL şirkətinin Baş icraçı direktorunun tabeliyində Aparat rəhbəri vəzifəsinə təyin edilir.

FED.az xəbər verir ki, İsmayıl bundan əvvəl “Taghiyev Operating Company” şirkətində Xarici əlaqələr və kommunikasiya üzrə menecer vəzifəsində çalışdığı müddətdə şirkətin xarici əlaqələlərinin və kommunikasiyasının genişləndirilməsində mühüm rol oynamışdır.

“Taghiyev Operating Company” şirkətindəki fəaliyyətindən əvvəl İsmayıl, İtaliyanın Bakıdakı səfirliyində müxtəlif vəzifələrdə çalışmaqla, görüşlərin və səfərlərin təşkilində, həmçinin müxtəlif vəzifəli şəxslər, eləcə də hökumət nümayəndələri ilə əlaqələrin qurulmasında dərin təcrübə qazanmışdır.

Aparat rəhbəri kimi İsmayıl, şirkətin Baş icraçı direktoru ilə birbaşa işləyərək ona biznesin gündəlik idarə olunmasında köməklik göstərəcək. Onun əsas prioritetlərindən biri Aparatın gündəlik işini tənzimləyən mövcud inzibati sistemin produktivliyini təyin edərək vaxtın planlanması, məlumatlandırma və qərararvermə proseslərini daha effektiv etməkdir.

İsmayıl, Baş icraçı direktorun görüşlərinin keçirilməsini tənzimləyəcək və icrasına nəzarət edəcək. O, həmçinin İcraiyyə Heyətinin üzvlərinə qərarvermə, layihələrin idarə olunması və biznes strategiyalarının icrası da daxil olmaqla yaxından dəstək edəcək. Rəhbərlik heyəti ilə sıx əməkdaşlıq edərək onlara prioritetlər və müxtəlif təşəbbüslərin icrası ilə əlaqədar kömək edəcək. İcraiyyə Heyətinin üzvləri ilə digər müvafiq tərəflər arasında əlaqələndirici şəxs qismində çıxış edərək effektiv kommunikasiyanın və əməkdaşlığın qurulmasında əhəmiyyətli rol oynayacaq.

Bundan əlavə İsmayıl, şirkət daxili və kənar aidiyyəti tərəflər arasında kommunikasiya və biznes əlaqələrinin qurulması və inkişafı istiqamətində çalışacaq.

Onun yüksək inkişafa nail olmaq əzmi və əlverişli əmək şəraitini təşviq etmək həvəsi bizim GL şirkətində qəbul etdiyimiz dəyərlərlə mükəmməl şəkildə uyğunluq təşkil edir. 

Xatırladaq ki, GL Salyan rayonunda “Kürsəngi” və “Qarabağlı”, Abşeron yarımadasında “Buzovna-Maştağa”, “Qala” və “Zirə” yataqları olmaqla Azərbaycanda beş yataqda neft-qaz əməliyyatları həyata keçirir. GL-in biznes portfelinə “Salyan Oil Limited”, “Taghiyev Operating Company” əməliyyat şirkətləri və sənaye üzrə çoxsaylı xidmətlər təqdim edən “GL Technical Services” daxildir.