İğdır-Naxçıvan boru kəməri tikildiyi halda, Muxtar Respublikasının təbii qaz ehtiyacları Türkiyəyə göndərilən Azərbaycan qazının bir hissəsi vasitəsilə təmin edilə bilər.

Bunu FED.az SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov bu gün "Türkiyə Respublikasının Energetika və Təbii Sərvətlər Nazirliyi ilə Azərbaycan Respublikasının Energetika Nazirliyi arasında Naxçıvan Muxtar Respublikasına Türkiyə Respublikasından təbii qazın tədarükünə dair Anlaşma Memorandumu"nun imzalanması məsələsini şərh edərək deyib.

İ. Əhmədov hazırda Naxçıvan Muxtar Respublikasının qazla təminatının İranla svop əməliyyatları əsasında həyata keçirildiyini xatırladıb. Söhbət illik 300-400 mln. kubmetr qazdan gedir.

"Naxçıvanın enerji təhlükəsizliyinin təmin edilməsi üçün belə bir kəmərin tikintisi məsələsi uzun müddət əvvəl gündəmdə idi və son zamanlarda bu mövzu yenidən aktuallaşıb", - deyə, İ. Əhmədov qeyd edib.

Onun sözlərinə görə, bütün bunlar iki ölkə arasında müvafiq memorandumun imzalanması uçun zamin yaradı: "Burada hər hansı konkret müddət və maliyyə qərarlarından söhbət getmir. Yəqin, müvafiq qərarlar gələcəkdə verilə bilər, bu məsələyə gələcəkdə baxıla bilər. Hazırda isə imzalanan məhz anlaşma memorandumudur".

Qeyd edək ki, Türkiyənin borularla nəqletmə operatoru olan "BOTAŞ" şirkəti hələ yayda İğdır-Naxçıvan qaz kəmərinin tikintisi çərçivəsində tədqiqat və mühəndislik işlərini aparacaq şirkətin seçimi üzrə tender elan edib. Məlumata əsasən, tender diametri 12 düym, uzunluğu isə təxminən 82 km olacaq qaz kəməri üzrə ərazi-tədqiqat, xəritə və müfəssəl mühəndislik işlərini əhatə edir. İşlər 270 gün ərzində həyata keçirilməlidir.