SOCAR-ın “Neftqaztikinti” Tresti “Azneft” İstehsalat Birliyinin sifarişi ilə “Qərbi Abşeron” yatağında ''Neftqazelmitədqiqatlayihə'' İnstitutunun layihəsi əsasında yeni 54 saylı stasionar dəniz platformasının tikintisini uğurla başa çatdırıb.
FED.az SOCAR-a istinadən xəbər verir ki, 10 istismar quyusunun qazılması üçün nəzərdə tutulan platformanın ümumi sahəsi 3480 kvadrat metr, çəkisi isə 2110 tondur. İstehsalat və yaşayış sahələrindən ibarət platforma 9 dayaq bloku üzərində yığılmış, ətraf mühitin və əməyin mühafizəsi üzrə bütün müasir norma və tələblərə uyğun şəkildə təmin edilmişdir. 4 minik və 7 yanalma meydançası, kabel xidmət meydançası, yaşayış bloku, 9 aralıq seksiyası, 2 piyada körpüsü, eləcə də çirkab suları üçün 9 müxtəlif tutumlu çən, 4 lafet doru, 2 boruyığma meydançası və digər zəruri avadanlıqlar quraşdırılmış, svaylar vurularaq sementlənmişdir. Qaynaq və bərkitmə işləri başa çatdırılmış, platforma yanğınsöndürmə sistemi, yanacaq, içməli və texniki su xətləri ilə təchiz edilmişdir.
Qeyd edək ki, dənizin 13,5 metr dərinliyində yerləşən platformada qazılacaq quyuların hər birindən sutkada 10-20 ton neft hasil ediləcəyi proqnozlaşdırılır.
“Qərbi Abşeron” yatağı üçün yeni platforma tikilib
15:59
30 May 2017
