Azərbaycanın dövlət enerji istehsalçısı olan «Azərenerji» ATSC uzun müddətdən bəri ilk dəfə mənfəətlə işləməyə başlayıb.
Eləcə də bax: “Azərenerji” azad edilmiş rayonların 150-dən çox sakinini işlə təmin edib - VİDEO
FED.az şirkətin konsolidasiya edilmiş hesabatına istinadən xəbər verir ki, şirkət 2021-ci ili 145 milyon 724 min manat mənfəətlə başa vurub.
Hesabata əsasən 2021-ci ildə «Azərenerji»nin satışdan gəliri əvvəlki illə müqayisədə 19,4% artaraq 1 milyard 281 milyon manat təşkil edib (2020-də 1 milyard 73 milyon manat idi).
Şirkətin digər mənbələrdən gəlirləri isə 39 milyon manat olub (20% azalma).
Nəticədə cəmi gəlir 1 milyard 320 milyon manata yüksəlib (2020-də 1 milyard 122 milyon manat idi).
Şirkətin xərcləri isə 16% artaraq 2021-ci ildə 1 milyard 190 milyon manata çatıb. 2020-ci ildə bu göstərici 1 milyard 25 milyon manat olmuşdu.
Nəticədə «Azərenerji»nin əməliyyat mənfəəti 2020-ci ildəki 97 milyon manata qarşı, 2021-ci ildə 130 milyon manata yüksəlib.
Şirkətin mənfəətə çıxmasına səbəb olan əsas məqamlardan biri valyuta ilə əməliyyatlarla bağlıdır- 2021-ci ildə «Azərenerji» bu əməliyyatlardan 84,4 milyon manat mənfəət edib. Halbuki, ötən il bu maddə üzrə 83,8 milyon manat zərər vardı.
Bundan başqa, 2020-ci ildə «Azərenerji» əmlak və avadanlıqların dəyirsizləşməsi üzrə 175 milyon manat itirmişdisə, 2021-ci ildə əksinə, 9,6 milyon gəlir formalaşıb.
Nəticədə 2020-ci ildə şirkətin vergidən əvvəlki zərəri 196 milyon manat olmuşdusa, 2021-ci ildə 197 milyon manat mənfəət yaranıb. 50 milyon manatlıq mənfəət vergi ödənişindən (2020-ci cəmi 10 milyon manat idi) və 1,5 milyon manat vəsaitin ehtiyatlardan qayıtmasından sonra «Azərenerji»nin xalis mənfəəti 147,2 milyon manat olub.
Xatırladaq ki, şirkət 2020-ci ildə 207 milyon manat, 2019-cu ildə isə 230 ilyon manat zərər etmişdi.
2021-c ildə «Azərenerji»nin aktivləri 120 milyon manat və ya 3% artaraq 4 milyard 148 milyon manata çatıb.
Şirkətin kapitalı isə 13,65 artaraq 1 milyard 644 milyon manata çatıb. Amma «Azərenerji»nin əvvəloki illərdən qalma 2,6 milyard manatlıq bölüşdürülməmiş zərəri var.
Şirkət ötən il öhdəliklərini 80 milyon manat yüngülləşdirərək 2,5 milyard manata endirib.
Xatırladaq ki, «Azərenerji» 2020-ci ildən etibarən Azərbaycan İnvestisiya Holdinqinin nəzarətinə verilib.
