Bakı Ali Neft Məktəbində Azərbaycan Respublikası Prezidenti yanında Bilik Fondu, Yeni Azərbaycan Partiyasının Gənclər Birliyi, Binəqədi Rayon Gənclər və İdman İdarəsinin birgə təşkilatçılığı ilə 8-ci qrant müsabiqəsinin qaliblərindən biri - BANM-in “Proseslərin avtomatlaşdırılması mühəndisliyi” ixtisasının 3-cü kurs tələbəsi Pakizə Paşayevanın “Daxili dünyam» adlı layihəsinin yekununa həsr olunmuş tədbir keçirilmişdir.
FED.az SOCAR-a istinadən xəbər verir ki, tədbirdə Azərbaycan Respublikası Prezidenti yanında Gənclər Fondunun sədri Fərhad Hacıyev, “İki sahil” qəzetinin baş redaktoru Vüqar Rəhimzadə, BANM-in rəhbərliyi və layihədə iştirakçı olan tələbə-gənclər iştirak etmişlər.
Tədbiri giriş sözü ilə açan BANM-in rektoru Elmar Qasımov Pakizə Paşayevanı təbrik etmiş, bildirmişdir ki, Neft Məktəbinin tələbələri bu layihələrin həyata keçirilməsi təşəbbüsləri ilə çıxış edir, Gənclər Fondu isə onların ideyalarını, təkliflərini gerçəkləşdirmək üçün şərait yaradır. Azərbaycan Prezidenti yanında Gənclər Fondunun sədri Fərhad Hacıyev qeyd etmişdir ki, Fond daim yaradıcı gənclərin ideyalarını layihə formatında maliyyələşdirərək həyata keçirməyə çalışır. “İki sahil” qəzetinin baş redaktoru Vüqar Rəhimzadə isə gənclərin layihələr vasitəsilə bilik və bacarıqlarını, potensialını effektli reallaşdırmasından, cəmiyyətdə layiqli yer tutmasından danışmışdır.
Pakizə Paşayeva müəllifi olduğu layihə haqqında məlumat vermiş, vurğulamışdır ki, layihə çərçivəsində film çəkilib və layihə iştirakçılarının daxili aləmi, fikir və düşüncələrini özündə əks etdirən kitab dərc olunmuşdur. Sonda “Daxili dünyam” layihəsinin iştrakçılarına sertifikatlar təqdim olunmuşdur.
BANM-də “Daxili dünyam” layihəsinə yekun vurulub
16:32
17 Fev 2017
