Bakıda keçirilən Azərbaycan-Rumıniya Universitetlərinin birinci Forumu çərçivəsində Bakı Ali Neft Məktəbi ilə Rumıniyanın Ploeşti Neft-qaz Universiteti (PGU) arasında əməkdaşlıq haqqında razılaşma və Erasmus+ mübadilə proqramı çərçivəsində əlaqələrin genişlənməsi haqqında müqavilə imzalanıb.

FED.az SOCAR-a istinadən xəbər verir ki, PGU-nun prorektoru, professor Mixail Minesku ilə keçirilmiş görüşdə BANM-in rektoru Elmar Qasımov imzalanan sənədlərin iki ali təhsil müəssisəsi arasında əməkdaşlığa təkan verəcəyinə əminliyini bildirib. PGU-nun prorektoru Mixail Minesku qeyd edib ki, Erasmus+ proqramı Avropada universitetlər arasında tələbə və müəllim mübadiləsinin təşkili, təcrübə keçmək və tədris etmək imkanları yaradır.

İmzalanmış əməkdaşlıq razılaşması çərçivəsində Erasmus+ proqramı ilə BANM-in tələbələri Ploeşti Neft-qaz Universitetində təhsil ala biləcəklər. 1948-ci ildə Rumıniyanın sənayeləşmə tələbi və neft-qaz sahəsində ixtisaslı kadr çatışmazlığından irəli gələn ehtiyacları təmin etmək məqsədi ilə yaradılmış Universitetdə neft-qaz mühəndisliyi, mexanika və elektrik mühəndisliyi, neft texnologiyası və neft-kimya kimi fakültələr fəaliyyət göstərir. Görüşdə iştirak etmiş Cluj-Napoca Texniki Universitetinin Beynəlxalq əlaqələr üzrə baş məsləhətçisi Sonia Karmen Munteanu təmsil etdiyi universitetdə mühəndislik proqramlarının tədris edildiyini və BANM ilə əməkdaşlığa açıq olduqlarını bildirib.