SOCAR Qaradağ rayonu ərazisində Qaz emalı zavodu və Neft-kimya kompleksinin inşa edilməsini planlaşdırır.
FED.az-ın məlumatına görə, SOCAR-ın “Davamlı inkişaf haqqında hesabat”ında bildirilir ki, 15 May 2017-ci il tarixində “Bir kəmər, bir yol” beynəlxalq forumu zamanı Pekin şəhərində SOCAR ilə Çin Milli Neft və Qaz Korporasiyası (CNPC) arasında “SOCAR GPC” layihəsi çərçivəsində Bakının Qaradağ rayonunda inşa ediləcək Qaz emalı zavodu və Neft-kimya kompleksinin ilkin işçi layihəsinin işlənib hazırlanması haqqında müqavilə imzalanmışdır. Müqavilə HQC (CNPC-nin törəmə şirkəti) və “Technip Italy” şirkətləri tərəfindən göstəriləcək xidmətlərin idarə olunmasını nəzərdə tutur.
Eləcə də bax: SOCAR-ın işçilərinin - SAYI ARTIB
Hesabatda qeyd edilib ki, layihənin əsas məqsədi təbii qazın tərkibində qazkimya istehsalı üçün yararlı olan qazın ağır fraksiyalarının (C2+) emalı və yüksək əlavə dəyər yaradan qaz-kimya məhsullarının istehsalından ibarətdir. İstehsal olunacaq məhsulların təqribən 5%-ə qədərinin yerli bazarda satışı, qalan miqdarların isə ixracı (əsasən Türkiyə, Avropa və s.) nəzərdə tutulur.
Layihə üzrə tikinti işlərinin həyata keçirilməsinə təxminən 12 000-15 000 nəfər işçi qüvvəsi cəlb ediləcəkdir. Zavodların 2023-cü ildə istismara veriləcəyi və təxminən 2000 nəfərin daimi iş yerləri ilə təmin edilməsi planlaşdırılır.
2017-ci il ərzində mühəndislik, satınalma və tikinti (EPC) müqaviləsinin tərtib olunmasına və müqavilə danışıqlarına təcrübəli beynəlxalq və yerli şirkətlər cəlb olunmuşdur. 2018-ci ilin sentyabr ayından EPC tender prosesinə başlanılmış və tenderə dəvət məktubları 11 EPCnin podratçı şirkətinə göndərilmişdir. Hazırda tender iştirakçıları tərəfindən EPC konsorsiumları formalaşdırılır.
Layihənin ümumi investisiya dəyəri təqribən 4.2 milyard ABŞ dolları həcmində qiymətləndirilir. Bu layihə miqyasına görə ölkə tarixində həyata keçirilən üçüncü ən böyük layihə olacaqdır. Layihə üzrə xərclərinin təqribən 30%-nin səhm kapitalı, 70 %-nin isə borc vəsaiti hesabına təmin olunması planlaşdırılır.
Hesabatda qeyd edilib ki, layihənin maliyyələşdirilməsinin uğurla və vaxtında həyata keçirilməsi üçün artıq müəyyən işlərə başlanılmışdır. Maliyyə modeli artıq hazırlanmış və layihənin maliyyələşdirilməsi üçün İtaliya (SACE), Cənubi Koreya (KSURE, Kexim) və Yaponiya (NEXİ, JBIC) maliyyə institutları ilə ilkin danışıqlar aparılmış və maliyyə institutları layihə maliyyələşdirilməsində maraqlı olduqlarını müvafiq niyyət məktubları ilə bildirmişdirlər.
Marja
