Bu ilin yanvar-iyul ayları ərzində Azərbaycan 2 ölkədən ümumilikdə 73,1 milyon dollar dəyərində 454,3 milyon kub metr təbii qaz idxal edib.

• Azərbaycanın xaricə satdığı təbii qaz - KƏSKİN UCUZLAŞIB - RƏQƏMLƏR

FED.az bu barədə Dövlət Statistika Komitəsinə istinadən xəbər verir.

Yeddi ayın nəticələrinə görə təbii qazın orta idxal qiyməti hər min kub metr üçün 161 dollar və ya 274 manat təşkil edib. Bu da o deməkdir ki, bir kub metr qazın idxal dəyəri 27 qəpiyə bərabər olub. Azərbaycanın təbii qaz aldığı ölkələr isə Rusiya (141,6 mln. m³) və Türkmənistan olub (312,7 mln. m³). Qeyd edək ki, bu dövrdə Rusiya qazının hər kub metri 31, Türkmənistan qazı isə təqribən 26 qəpiyə idxal edilib.

Lakin bu dövrdə də Azərbaycan əsas qaz ixracatçısı olaraq qalır. Belə ki, qeyd olunan dövr ərzində 6 ölkəyə ümumilikdə 4,8 milyard dollar dəyərində 13,8 milyard kub metr qaz ixarc edilib. Qazın orta ixrac qiyməti hər min kub metr üçün 343 dollar və ya 584 manat təşkil edib (1 m³=58 qəpik).

Bu dövrdə ən çox qaz ixracı 5,8 milyard m³ olmaqla Türkiyə və İtaliyaya həyata keçirilib. Yeddi ayın nəticələrinə əsasən ucuz qaz hər kub metr üçün 29 qəpiyə Gürcüstana, ən baha isə 68 qəpiyə İtaliyaya ixrac olunub.