Mayın 20-si səhər saat 6-7 radələrində Azərbaycan qazının Avropaya nəqli üçün inşa olunan Trans-Adriatik Boru kəmərinin (TAP) sınaq işləri çərçivəsində Azərbaycandan ilk qaz molekulları Albaniya ərazisinə çatıb.
Eləcə də bax: ABƏŞ SOCAR-a verilən səmt qazının - HƏCMİNİ ARTIRIB
FED.az xəbər verir ki, bu barədə SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov məlumat verib.
“İndiyədək Albaniya təbii qaz idxal etmirdi və ölkənin ərazisindən tranzit qaz keçmirdi. Beləliklə, Albaniyanın tarixində ilk dəfə olaraq boru kəməri vasitəsilə qaz çatdırılıb. Bununla Albaniya gələcəkdə öz enerji təchizatında təbii qazdan istifadə etmək imkanı əldə etmiş oldu. Bu həm Albaniya, həm Avropa Birliyi, həm də Azərbaycan üçün böyük hadisədir. Azərbaycan üçün hasil edilən qazın artıq növbəti ölkəyə çatması baxımından əhəmiyyətli hadisədir”, - SOCAR rəsmisi qeyd edib.
O, həmçinin məlumat verib ki, hazırda TAP-ın direktorlar Şurasına SOCAR rəhbərlik edir və şirkət daim TAP-ın irəliləyişini izləyir. Onun sözlərinə görə, koronavirus pandemiyasının geniş vüsət almasına baxmayaraq TAP-da işlər qrafikə uyğun olaraq davam etdirilir.
SOCAR rəsmisi həmçinin xatırladıb ki, Yunanıstanda boru kəmərinin inşası artıq tam başa çatdırılıb, bütün testlər keçirilib, bir neçə ay əvvəl boru kəmərinin həmin hissəsinə texniki qaz vurulub: “Düşünürük ki, pandemiya ilə əlaqədar hər hansı fövqəladə hal baş verməzsə bu il ərzində TAP üzrə bütün işlər başa çatdırıla bilər. Boru kəmərinin son təyinat nöqtəsi olan İtaliyaya çatmasına artıq aylar qalıb. İnanırıq ki, bütün çətinliklərə baxmayaraq TAP işləri vaxtında tamamlamağa çalışacaq. Yunanıstan, İtaliya və digər ölkələrə tarixdə ilk dəfə olaraq təbii qaz nəql olunacaq”.
Qeyd edək ki, Cənub Qaz Dəhlizinin bir hissəsi olan Trans Adriatik Boru Kəməri ilə ilkin mərhələdə hər il "Şahdəniz-2" layihəsi çərçivəsində hasil olunan qazın 10 milyard kubmetrinin Avropaya nəql olunacağı nəzərdə tutulur. Yunanıstanla Türkiyə sərhədindəki Kipoy kəndi yaxınlığında Trans Anadolu boru kəmərinə (TANAP) qoşulan TAP Yunanıstan, Albaniya ərazisindən keçərək Adriatik dənizinin dibi ilə İtaliyanın cənubunadək uzanacaq.
2013-cü il iyunun 28-də "Şahdəniz" konsorsiumu tərəfindən rəsmi olaraq seçildiyi açıqlanan TAP kəmərinin uzunluğu 878 kilometrdir. Bunun 550 kilometri Yunanıstan, 215 kilometri Albaniya ərazisinin, 105 kilometri Adriatik dənizi dibinin, 8 kilometri İtaliya ərazisinin payına düşür. Marşrutun Albaniya ərazisində yerləşən ən hündür nöqtəsi 1 800 metr yüksəklikdə, dəniz dibindəki ən alçaq nöqtəsi 820 metr dəniz səviyyəsindən aşağıdır.
Təməlatma mərasimi 17 may 2016-cı il tarixində Yunanıstanın Saloniki şəhərində keçirilən TAP vasitəsilə Avropaya Azərbaycandan ilk qazın bu il nəql ediləcəyi gözlənilir.
TAP vasitəsilə Bolqarıstanın qaz ehtiyaclarının 33 faizi, Yunanıstanın 20 faizi, İtaliyanın 10,5 faizinə qədəri ödəniləcək.
Report
