Azərbaycan neft və qazdan sonra Avropa ilə daha bir sahədə böyük layihə reallaşdıracaq.
Eləcə də bax: «Qazprom» bu ölkənin qazını kəsəcəyini elan etdi – BAŞ NAZİRİ BAKIYA GƏLDİ
FED.az xəbər verir ki, söhbət Avropa ölkələrinə elektrik enerjisi ixracından gedir.
Qeyd edək ki, hazırda Azərbaycan artıq enerji ixracçısı kimi çıxış edir – Azərbaycanda istehsal edilən elektrik enerjisi qonşu Gürcüstan və onun üzərindən Turkiyəyə ixrac edilir.
İndi isə söhbət Avropa Birliyinə daxil olan ölkələr Rumıniya və Macarıstandan gedir. Nəzərdə tutulan layihəyə əsasən Qara Dənizin dibi ilə çəkiləcək enerji xətti vasitəsilə elektrik enerjisi Gürcüstandan keçməklə bu iki Avropa ölkəsinə ixrac ediləcək.
Nəzərdə tutulan layihənin detalları Azərbaycanın energetika naziri Pərviz Şahbazovun Gürcüstan səfərində ətraflı müzakirə edilib.
Gürcüstanın Baş nazirinin müavini, iqtisadiyyat və davamlı inkişaf naziri Levan Davitaşvili ilə görüşdə iki ölkə arasında elektrik enerjisi sahəsində əməkdaşlıq barədə imkanlar nəzərdən keçirilib.
Nazirliyin yaydığı məlumata görə, görüşdə, dayanıqlı enerji təhlükəsizliyi üçün elektrik enerjisi üzrə regional əməkdaşlığın gücləndirilməsinin vacibliyini vurğulayan nazir Pərviz Şahbazov bu xüsusda Qara dəniz sualtı elektrik və rəqəmsal qoşulma layihəsinin mühüm rol oynayacağını bildirib. Nazir deyib ki, Azərbaycan, Gürcüstan, Rumıniya və Macarıstanı əhatə edəcək bu layihə birgə enerji təhlükəsizliyi layihələrinin davamı olmaqla Avropanın təchizat mənbələrini şaxələndirəcək. Bu layihənin gerçəkləşməsinə Azərbaycanın Xəzər dənizindəki nəhəng külək enerjisi potensialı, irihəcmli istehsal güclərinin yaradılması ilə bağlı atılan addımlar, həmçinin Avropa İttifaqı və Dünya Bankının dəstəyi təminat yaradır.
Gürcüstan baş nazirinin müavini, iqtisadiyyat və davamlı inkişaf naziri Levan Davitaşvili isə bu layihəni Gürcüstan üçün tarixi layihə adlandırıb və bildirib ki, ölkəsi Qara dəniz sualtı elektrik xətti vasitəsilə yeni əməkdaşlıq formatının yaradılmasına hazırdır.
Görüşdə, həmçinin elektrik enerjisinin ixracı və tranzitinin artırılması ilə əlaqədar hazırda icra edilən və planlaşdırılan tədbirlər, Azərbaycan, Gürcüstan və Türkiyə arasında elektrik enerjisi üzrə əməkdaşlığın genişləndirilməsi məsələləri müzakirə edilib.
Layihəyə Gürcüstan hökumətinin başçısı da dəstək verib. Pərviz Şahbazovun Gürcüstanın baş naziri İrakli Qaribaşvili ilə görüşündə Azərbaycan və Gürcüstanın enerji sistemlərinin ötürülmə imkanlarının artırılması, Azərbaycandan ixrac edilən elektrik enerjisinin Türkiyə və Avropa ölkələrinə nəqlinin təmin edilməsi ilə bağlı görülən işlər nəzərdən keçirilib. «Azərbaycan, Gürcüstan, Rumıniya və Macarıstanı özündə birləşdirəcək Qara dəniz sualtı elektrik və rəqəmsal qoşulma layihəsinin reallaşdırılmasından irəli gələn məsələlər müzakirə edilib və bu layihənin ölkələrimiz arasında münasibətlərdə yeni səhifə açacağı qeyd edilib»-deyə məlumatda bildirilir.
Xatırladaq ki, yanvar-iyul aylarında Azərbaycan xaricə 600 milyon kilovat saata yaxın enerji ixrac edib. Bunun böyük hissəsi - 392 milyon kilovatt saat Türkiyəyə (23,6 milyon dollar), 123 milyon kilovat saat Gürcüstana (təqribən 7 milyon dollar), 69 milyon kilovat saat isə İrana (2,8 milyon dollar) ixrac edilib.
Yanvar-avqust aylarında isə enerji ixracının həcmi 1,4 milyard kilovat saatı keçib.
Qarşıdakı illərdə Azərbaycanda elektrik enerjisi isteshalının və enerji ixracçısı imkanlarının daha da artması gözlənilir. Belə ki, təkcə ərəb şirkətləri ilə birgə reallaşdırılan bərpa olunan enerji layihələri çərçivəsində ölkədə əlavə 470 Meqavat saat gücündə əlavə enerji hasilatı imkanı yaranacaq.
Belə ki, Səudiyyə Ərəbistanınının “ACWA Power” şirkəti ilə yanvar ayından başlanan layüihəyə əsasən 240 meqavat gücündə Külək Elektrik Stansiyası inşa edilir. Apreldə isə BƏƏ-nin «Masdar» şirkəti günəş elektrik stansiyasının tikintisinə başlayıb. Bu stansiya 230 meqavat gücündə olacaq Artıq 2023-cü ildə bu güclər Azərbaycanın enerji sisteminə daxil ediləcək. Nəticədə Azərbaycan xam neft, neft məhsulları və təbii qazla yanaşı, eyni zamanda, elektrik enerjisinin böyük istehsalçısı və ixracatçısı olacaq.
Üstəlik, işğaldan azad edilən ərazilərdə planlaşdırılan elektrik stansiyaları da regionun enerjiyə olan tələbatını ödəməklə yanaşı, ixrac imkanları da yaradacaq. Bir qədər əvvəl prezident İlham Əliev bildirib ki, aparılan hesablamalara əsasən, günəş, külək enerji növlərinin istehsal həcmi 9-10 min meqavata çata bilər: «Artıq ilkin addımlar da atılır, bp şirkəti ilə generasiya gücü 200 meqavatdan çox olan günəş elektrik stansiyasının inşası ilə bağlı danışıqlar gedir. Ümid edirəm ki, bu danışıqlar da uğurla nəticələnəcək. bu bölgəyə digər iri şirkətlər də maraq göstərirlər».
