Qiymətləndirilmənin keçirilməsində əsas məqsəd dövlət xidmətləri haqqında məlumatların vahid mənbədə sistemləşdirilməsi, xidmətdən yararlanma və xidmət üçün ödəniş imkanlarının inkişaf etdirilməsi, şəffaflığın təmin olunması, şikayət mexanizmlərinin inkişaf etdirilməsi, əməkdaşların peşəkarlıq səviyyəsinin ölçülməsi və ən əsas da elektronlaşdırılma ilə bağlı prosesin sürətləndirilməsi yolu ilə bu sahədə idarəetmənin çevikliyinin təmin edilməsi, təhlil və proqnozlaşdırma imkanlarının artırılmasıdır.
FED.az xəbər verir ki, bunu təqdimat zamanı "ASAN xidmətl”ə İş departamentinin direktor müavini İnam Yusifov bildirib.
Onun sözlərinə görə, bu məqsədlə 2023-cü ildə Dövlət Agentliyi tərəfindən 23 mərkəzi icra hakimiyyəti orqanının 208 xidməti, 15 yerli icra hakimiyyəti orqanının 170 xidməti və 9 hüquqi şəxsin 60 xidməti daxil olmaqla, ümumilikdə 438 xidmət qiymətləndirilib.
"Qeyd edək ki, “Azərişıq” ASC vətəndaş məmnunluğunu və əlçatanlığını artırmaq məqsədilə xidmətləri onlayn platformaya inteqrasiya etmiş və göstərdiyi 17 adda xidmətdən 15 xidmət üzrə e-gov.az və ya e-service.azerishiq.az portalı vasitəsilə müraciət etmək imkanı yaratmışdır. Tərəfimizdən Dövlət Xidmətlərinin Elektron Reyestrinə (DXR) daxil edilmiş xidmətlərin 2023-cü il üzrə xidmət səviyyəsinin ölçülməsi, məlumatların toplanılmasını, yoxlanılmasını, təhlilini və qiymətləndirilməsini aparmaq üçün “ASAN xidmət indeksi”ni təşkil edən 155 adda meyarlar və altmeyarlar üzrə tərəfimizdən ümumilikdə 1395 sorğu cavablandırılmış, əsaslandırıcı sənədlər təqdim olunmuşdur", - İnam Yusifov bildirib
Tədbirdə mərkəzi icra hakimiyyəti, yerli icra hakimiyyəti və hüquqi şəxslər üzrə “ASAN xidmət indeksi” qiymətləndirilməsi nəticələri açıqlanaraq qeyd olundu ki, “Azərişıq” Açıq Səhmdar Cəmiyyəti “ASAN xidmət indeksi”nin qiymətləndirmə tarixində 98.31% ilə 5 ulduzluq rekord nəticə əldə edib. Ötən illərdə də “Azərişıq” xidmətlərin keyfiyyətinin artırılması sahəsində mühüm uğurlar əldə etmiş, xidmət keyfiyyətinə görə dövlət qurumları arasında ön sıralarda yer almışdır. 2023-cü il üzrə əldə olunan nəticə “Azərişıq” tərəfindən həyata keçirilmiş sistemli və məqsədəuyğun islahatların nəticəsidir.
"Təqdimatdan göründüyü kimi, ötən il ərzində ASAN Xidmətlə İş Departamenti tərəfindən ümumilikdə 323601 müraciət qəbul olunmuşdur. Müraciətlərin 8314 ədədi elektron şəkildə, 315287 ədədi isə xidmət mərkəzlərində qəbul olunmuşdur. Sahibkarlıq subyektlərinin enerji təchizatı şəbəkəsinə qoşulması üzrə 7985 müraciətdən 3930 müraciət elektron şəkildə qəbul olunmuşdur ki, bu da ortalama 49% elektron müraciət deməkdir", - "Azərişıq" nümayəndəsi qeyd edib.
O əlavə edib ki, görülmüş tədbirlər nəticəsində 2023-cü ilin son 3 rübü ərzində sahibkarlıq subyektlərinin elektron müraciətlərinin sayı ümumi müraciətlərin 50%-dan artığını təşkil edir. Enerji təchizatı şəbəkəsinə qoşulma xidmət üzrə 2023-cü ildə Bakı, Regional ASAN xidmət və ASAN Kommunal mərkəzləri üzrə abonentlər 299695 kVt enerji gücü ilə təmin olunmuşlar. Təqdimatdan görünür ki, təmin olunan gücün 54.6%-ı Bakı RETSİ-nin, 45.4%-ı isə regionların payına düşür
