Prezident İlham Əliyev Avropa İttifaqı Şurasının Prezidenti Şarl Mişelin dəvəti ilə bu gün Belçika Krallığının paytaxtı Brüsselə işgüzar səfərə gedib.
FED.az-ın məlumatına görə, İlham Əliyevin Şarl Mişellə təkbətək görüşü keçirilib.
Görüşdə İlham Əliyev qarşı tərəfin Ermənistan ilə Azərbaycan arasında sülh müqaviləsinin hazırlanması, iki ölkənin münasibətlərinin normallaşdırılması, nəqliyyat dəhlizlərinin açılması, sərhədlərin delimitasiyası və demarkasiyası proseslərinə verdiyi dəstəyi yüksək qiymətləndirdi və artıq 3-cü belə görüşün təşkilinə görə Şarl Mişelə təşəkkürünü bildirdi.
İlham Əliyev xatırladıb ki, rəsmi Bakı Ermənistan ilə Azərbaycan arasında münasibətlərin normallaşdırılması və sülh müqaviləsinin imzalanması üçün Ermənistana beynəlxalq hüquqa əsaslanan 5 prinsip təqdim edib. Sülh müqaviləsinin hazırlanmasında bu prinsiplər əsas rol oynayır.
Dövlət başçısı deyib ki, iki ölkə arasında sülh müqaviləsinin sürətlə hazırlanacağına ümid edir.
İlham Əliyev Şarl Mişelə xatırladıb ki, rəsmi Bakı bundan əvvəlki – aprelin 6-da keçirilən görüşün nəticələrinə uyğun olaraq üzərinə düşən işləri həyata keçi rir, yəni Azərbaycan tərəfi sülh müqaviləsi üzrə danışıqlara başlamaq üçün İşçi Qrupunun tərkibini, həmçinin sərhədlərin delimitasiyası üzrə milli komissiyanın tərkibini müəyyənləşdirib və artıq danışıqlara hazırdır.
Bununla yanaşı, Azərbaycan prezidenti Avropa Birliyinin rəhbərinə xatırladıb ki, işğaldan azad edilmiş ərazilərdəki mina problemi və Birinci Qarabağ müharibəsində itkin düşmüş hesab olunan 4 minə yaxın şəxsin taleyinə aydınlıq gətirilməsi vacibdir. Eyni zamanda qeyd edilib ki, Ermənistan tərəfi 10 Noyabr Bəyanatının bütün müddəalarını icra etməlidir.
Avropa İttifaqı Şurasının Prezidenti Şarl Mişel bildirib ki, Avropa İttifaqı Ermənistan ilə Azərbaycan arasında münasibətlərin normallaşdırılması üçün vasitəçilik səylərini davam etdirəcək.
Görüşdə qarşılıqlı maraq doğuran digər məsələlər ətrafında da fikir mübadiləsi aparıldı.
