Dekabrın 7-də Hesablama Palatasının növbəti kollegiya iclası keçirilib.
FED.az xəbər verir ki, çıxış edən qurumun sədri Vüqar Gülməmmədov bu il sentyabrın 5-dən “Hesablama Palatası haqqında” yeni qanunun qüvvəyə mindiyini bildirib, Palatanın qanunda müəyyən edilmiş fəaliyyət istiqamətləri, hüquqları, vəzifələri və bunların həyata keçirilməsi ilə bağlı məsələlərin tənzimlənməsi üzrə qarşıda duran işlər barədə danışıb.
Daha sonra iclas iştirakçıları dövlət büdcəsinin dövlət əsaslı vəsait qoyuluşundan və ehtiyat fondlarından Azərbaycan Avtomobil Yolları Dövlət Agentliyinə ayrılan vəsaitlərdən istifadəyə dair hesabatı, Bərdə Regional Mədəniyyət İdarəsinə ayrılan büdcə vəsaitlərinin və büdcədənkənar daxilolmaların proqnozlaşdırılması və icrasına dair hesabatı müzakirə edərək təsdiq edib, hər bir nəzarət tədbiri üzrə kollegiya qərarının icrasını təmin etmək məqsədilə aidiyyəti dövlət qurumlarına təqdimatların göndərilməsi və audit tədbirlərinin nəticələri barədə məlumatların Milli Məclisə təqdim olunması qərara alınıb.
Bundan başqa, iclasda “Hesablama Palatası tərəfindən dövlət maliyyə nəzarəti tədbirlərinə hazırlıq, kənar dövlət maliyyə nəzarəti tədbirlərinin keçirilməsi və nəticələrinin rəsmiləşdirilməsi qaydaları” geniş müzakirə olunaraq təsdiq olunub.
