İnternetdə yerləşdirilən işə qəbul elanlarında qanunsuz yolla Dövlət Gömrük Komitəsinin (DGK) adından istifadə olunduğu müəyyən edilib
FED.az xəbər verir ki, bu barədə komitənin açıqlamasında bildirilir.
Dövlət Gömrük Komitəsinin yüksək vəzifəli şəxsi - İŞDƏN ÇIXARILDI
Komitə bildirir ki, DGK-nin aidiyyəti srtuktur bölmələri tərəfindən aparılan araşdırmalar zamanı internetdə yerləşdirilən işə qəbul elanlarında qanunsuz yolla DGK-nın adından istifadə olunduğu müəyyən edilib.
Belə ki, www.offer.az/qeydiyyatci-56-vakansiya-2022-49006/ linki üzərindən “Ötüken Baku nəşriyyat və poliqrafiya şirkətinə “qeydiyyatçı” xanım tələb olunur” məzmunlu elanla maraqlanan şəxslərə mobil nömrə ilə əlaqə saxlamaq təklif olunur. Müraciət edənlərə özünü “DGK-nın Ötüken Bakı nəşriyyat və poliqrafiya departamentinin qəbul qeydiyyatı üzrə baş direktoru Rəşad Hüseynov” kimi təqdim edən şəxs vatsap şəbəkəsi üzərindən vətəndaşlardan müxtəlif sənədlər istəyir və bank kartı göndərərək 54 manat rüsum ödəməyi təklif edir.
Digər elanda isə Rəşad Hüseynov özünü DGK-nın Aksizli Mallar üzrə Baş Gömrük İdarəsinin “Novartis” Bakı dərman departamentinin koordinatoru kimi təqdim edir və yenə də vatsap şəbəkəsi üzərindən vətəndaşlardan müxtəlif sənədlər istəyir və bank kartı göndərərək 54 manat rüsum ödəməyi təklif edir.
Dövlət Gömrük Komitəsi vətəndaşlara diqqətli olmağı tövsiyə edir və bildirir ki, gömrük orqanlarına işə qəbul Komitənin rəsmi internet səhifəsində əvvəlcədən yerləşdirilən elan əsasında müsabiqə yolu ilə aparılır və yuxarıda qeyd edilən elanların, işçi tələb olunduğu qurumların gömrük orqanlarına heç bir aidiyyəti yoxdur.
Dövlət Gömrük Komitəsi qeyd olunan qanunazidd hərəkətlərin araşdırılması ilə bağlı Daxili İşlər Nazirliyinə rəsmi müraciət edib.
