2020-ci il ərzində Dövlət Gömrük Komitəsinin (DGK) xətti ilə dövlət büdcəsinə 3 milyard 938 milyon 242,2 min manat daxil olub ki, bu da 2019-cu il ilə müqayisədə 10,7% azdır.
DGK-nın verdiyi məlumata görə, ötən il dövlət büdcəsinə daxil olan gömrük rüsumlarının həcmi 2019-cu il ilə müqayisədə 8,4% azalaraq 1 milyard 16 milyon 609 min manat təşkil edib.
ƏDV üzrə daxilolmalar isə 8,7% azalaraq 2 milyard 741 milyon 485 min manata bərabər olub. Aksizlər üzrə 2020-ci il ərzində daxilolmalar 42,5% azalaraq 143 milyon 511,1 min manat təşkil edib.
Yol vergisi üzrə daxilolmaların həcmi 36 milyon 637,1 min manat təşkil edib ki, bu da 2019-cu ildə qeydə alınan göstəricidən 17,5% azdır.
2020-ci ilin dekabr ayında Komitəsinin xətti ilə dövlət büdcəsinə 352 milyon 725,8 min manat həcmində vergi və rüsumlar daxil olub ki, bu da 2019-cu ilin eyni ayı ilə müqayisədə 12,3% az, 2020-ci ilin noyabr ayı ilə müqayisədə isə 11,6% çoxdur.
Ötən ilin dekabr ayı ərzində dövlət büdcəsinə daxil olan gömrük rüsumlarının həcmi 2019-cu ilin analoji dövrü ilə müqayisədə 6,4% azalaraq 103 milyon 613,2 min manat olub. 2020-ci ilin noyabr ayı ilə müqayisədə isə bu göstərici 18,7% artıb.
Həmçinin, 2020-ci ilin dekabr ayı ərzində ƏDV üzrə daxilolmalar 2019-cu ilin eyni ayı ilə müqayisədə 14,3% azalaraq 230 milyon 415 min manat (2020-ci ilin noyabr ayı ilə müqayisədə 8,3% çox), aksizlər üzrə 18,1% azalaraq 15 milyon 381,7 min manat (noyabr ilə müqayisədə 19,7% çox), yol vergisi üzrə daxilolmalar isə 14% azalaraq 3 milyon 315,9 min manat (noyabr ilə müqayisədə 11,4% çox) təşkil edib.
