Moskvadakı "Oçakovo" pivə və alkoqolsuz içkilər zavodu ticarət şəbəkələrinə CoolCola, Fanta və Street adı altında Coca-Cola, Fanta və Sprite içkilərinə analoq qazlı içkilər təqdim etməyə başlayıb.
FED.az xəbər verir ki, bu barədə şirkətin marketinq şöbəsinin rəhbəri Aleksey Zaxariçev məlumat verib.
"Daha çox ictimai iaşə şəbəkələrini içkilərlə təmin etməyi planlaşdırırıq. Hazırda bu istiqamətdə işlər aparılır", - bildirib.
Onun sözlərinə görə, içkilər Magnit, X5 şəbəkələrinin mağazalarında, eləcə də bir çox marketlərdə və çatdırılma xidmətlərində təqdim olunur.
Zaxariçev bildirib ki, şirkət bu əmtəə nişanlarını uzun illər əvvəl qeydiyyatdan keçirib və onlara olan hüquqlar təsdiqlənib.
"Dizayndakı rənglərə gəlincə, bu rənglər bütün qlobal içki bazarı üçün standartdır. Şirkətlərin heç birinin rənglər üzərində monopoliyası yoxdur", - Zaxariçev yekunlaşdırıb.
Mart ayında Coca-Cola Ukrayna ətrafında yaranmış vəziyyət fonunda Rusiyada biznes fəaliyyətini dayandırdığını elan edib. May ayında şirkətin baş direktoru Ceyms Kuinsi bildirmişdi ki, Coca-Cola şirkəti Rusiya bazarından tamamilə çıxacağını istisna etmir. Martın 9-da digər böyük qazlı içki istehsalçısı PepsiCo Rusiyada Pepsi, 7 up və Mirinda brendləri altında içkilərin satışını, eləcə də reklam fəaliyyətini dayandırdığını açıqlayıb. (Marja)
