Səudiyyə Ərəbistanı ilə ticarət əməliyyatları aparan yerli sahibkarlara, o cümlədən kiçik və orta biznes subyektlərinə dəstək məqsədilə İqtisadiyyat Nazirliyinin Kiçik və Orta Biznesin İnkişafı Agentliyinin (KOBİA) təşəbbüsü və dəstəyi ilə Səudiyyə İnkişaf Fondu Azərbaycana yeni kredit xətti açıb.
FED.az xəbər verir ki, bu barədə KOBİA-dan bildirilib.
Məlumata görə, bu məqsədlə bu gün Səudiyyə İnkişaf Fondunun İxrac Proqramı və “Kapital Bank” ASC arasında razılaşma sənədi imzalanıb. Sənədi Səudiyyə İxrac Proqramının baş direktoru Abdulmohsen Al-Khayal və “Kapital Bank”ın İdarə Heyətinin sədri Rövşən Allahverdiyev imzalayıblar.
Təşkil olunmuş görüşdə KOBİA-nın İdarə Heyətinin sədri Orxan Məmmədov Azərbaycan və Səudiyyə Ərəbistanı arasında iqtisadi-ticarət, biznes əməkdaşlığı, xüsusilə də KOB sahəsində əlaqələrin inkişafı üçün böyük potensialın olduğunu qeyd edib, Agentliyin təşəbbüsü və dəstəyi ilə reallaşdırılan yeni proqramın Səudiyyə Ərəbistanı ilə ticarət əməliyyatları aparan yerli KOB-lar üçün əhəmiyyətli olacağını vurğulayıb.
Səudiyyə Ərəbistanının Azərbaycandakı səfiri Haməd bin Abdullah bin Səud bin Xudeyr ölkələrimiz arasında bütün sahələrdə əməkdaşlığın inkişaf etdirilməsi zərurətini qeyd edib, yeni əməkdaşlıq proqramının ölkələrimiz arasında ticarət və KOB sahəsində əlaqələrin genişləndirilməsi üçün faydalı olacağını bildirib.
R.Allahverdiyev isə Bankın kiçik və orta sahibkarlığın inkişafına dəstək verərək, müxtəlif tarif paketləri təqdim etdiyini, yeni proqramın da biznesin inkişafına töhfə verəcəyini vurğulayıb.
A.Al-Khayal proqram çərçivəsində açılmış kredit xəttinin Səudiyyə Ərəbistanı mənşəli mallar və xidmətlər idxal edən Azərbaycan sahibkarlarına, xüsusilə də kiçik və orta biznes subyektlərinə ticarət əməliyyatları zamanı dəstək olacağını vurğulayıb.
