MÜSİAD Azərbaycan heyəti Milli Məclisin iqtisadi-siyasət komitəsi ilə görüşüb.
"MÜSİAD Azərbaycan"dan FED.az-a verilən məlumata görə, görüşdə, MÜSİAD Azərbaycan idarə heyətinin sədri Rəşad Cabirli, Sait Yinanç, Alim Şentürk, Əli Qədirbəyli, Sərxan Sultanlı və Muhterem Öz, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili, komitə sədrinin müavini Əli Məsimli, deputatlar - Mahir Abbaszadə, Rüfət Quliyev və Vahid Əhmədov iştirak ediblər.
Məlumata əsasən, görüş zamanı Milli Məclisin komitəsi ilə MÜSİAD Azərbaycan arasında məsləhətləşmələr aparılıb. Bununla yanaşı, tərəflər arasında kommersiya fəaliyyəti və layihələri ilə bağlı birgə iş və dəstək məsələləri üzrə müzakirələr aparılıb.
Məlumatda qeyd olunur ki, görüşün yekunu olaraq, tərəflər qanuna hazırlıq və ya digər məsələlərlə bağlı işçi qrupları yaradılarkən MÜSİAD-ın Azərbaycan nümayəndələri də iştirakı haqqında razılıq əldə ediblər.
Eyni zamanda görüş əsnasında qeyd olunub ki, MÜSİAD Azərbaycan hüquq və ya kommersiya ilə bağlı müxtəlif məsələlərlə bağlı təkliflər və problemləri komitəyə göndərəcək.
“Bütün bunlarla yanaşı, gələcəkdə müəyyən ediləcək tarixdə, komitə üzvü, Lənkəran millət vəkili Rüfət Quliyevin iştirakı ilə rayonunun mülkiyyətçiləri, sahibkarları və investorları ilə görüş təşkil ediləcək”, -deyə məlumatda bildirilir.
Məlumat üçün qeyd edək ki, MÜSİAD-ın 81 ölkədə, 164 məntəqədə ümumilikdə 12 mindən çox üzvü, Türkiyədə isə 83 şöbəsi var.
Bu il MÜSİAD 33 yaşını qeyd edib.
