Yanvarın 27-də Azərbaycan Respublikasının İran İslam Respublikasındakı səfirliyində baş vermiş terror aktı ilə əlaqədar Türkiyənin Aktau şəhərindəki Baş konsulu Sabri Alptekin və əməkdaşları, azərbaycanlı iş adamları, diaspora fəalları, qazax ictimaiyyətinin üzvləri və azərbaycanlı gənclər Azərbaycanın Aktaudakı Baş konsulluğa toplanıblar.
Azərbaycanlı İş Adamları Birliyi yaradılacaq - AKTAUDA TOPLANTI
Qonaqlar hadisə nəticəsində şəhid olmuş Orxan Əsgərovun ailəsinə və yaxınlarına baş sağlığı verib, terror hadisəsini qəti qınayaraq günahkarların cəzalandırılmasını tələb ediblər.
FED.az xəbər verir ki, tədbirdə konsulluğun nümayəndəsi çıxış edərək, terror hadisəsini qınayıb və bunun Türk dünyasına qarşı olduğunu vurğulayıb:
«Bizim yüksək rütbəli, diplomat statusuna malik olan zabit Orxan müəllim terror hücumuna məruz qalib, həlak olub. Mən şəxsən onu tanıyırdım. Çox yaxşı insan idi. Bu terror hadisəsi tək bizə deyil, bütün millətimizə, Türk dünyasına qarşıdır».
Məlumata görə, Türkiyənin Baş konsulu Sabri Alptekin terror hadisəsinin Türkiyə dövləti tərəfindən şiddətlə qınanıldığını bildirmiş, şəhid olmuş Orxan Əsgərova rəhmət, yaralananlara Allahdan şəfa diləmiş və Azərbaycan dövlətinin daim yanında olduqlarını bildiriblər:
«Bu hadisə ilə bağlı Türkiyə Prezidenti Rəcəb Tayyib Ərdoğan başda olmaqla, Xarici İşlər Naziri Mövlüt Çavuşoğlunun və digər rəsmilər Prezident İlham Əliyevə, eləcə də xarici işlər naziri Ceyhun Bayrama zəng edərək, kədərimizə şərik olduqlarını bildirib və terroru dəstəkləyənlər tarixin heç bir dövründə çirkin məqsədlərinə çatmayacaqlarını qeyd edərək, qardaş Azərbaycanın yalnız olmadığını və bundan sonra da hər zaman yanlarında olacaqlarını vurğulayıb».
Türk diplomatı Türkiyə Respublikasının diplomatlarına qarşı törədilən terror hadisələri barədə məlumat verərək, Azərbaycan Respublikasının regionda və dünyada iqtisadi-hərbi qüdrəti ilə söz sahibinə çevrilməsinin kənar qüvvələr tərəfindən qəbul edilmədiyini qeyd edib. Bu səbəbdən də, bu cür xain terror hadisələrini törətməklə iç üzlərini göstərməyə çalışdıqlarını bildirib.
Tədbirdə Azərbaycanın Aktaudakı Baş Konsulu Elçin Məmmədov, Türkiyənin Aktau şəhərindəki Baş Konsulu Sabri Alptekin, “Turan Group Holding” şirkətinin rəhbəri Qaşqay Namazov, o cümlədən, Türkiyənin və Qazaxıstanın tanınmış ictimai xadimləri, orada təhsil alan tələbələr də iştirak ediblər.
Tədbirdə bildirilib ki, baş verən hadisə ilə əlaqədar olaraq Aktaudakı Baş konsulluğun mühafizəsi də gücləndirilib. «İnzibati binanın müvafiq radiuslar üzrə gücləndirilməsi məqsədilə, Mangistau vilayətinin akimliyinə və polis idarəsinə müraciət olunub. Nəticədə polis postlarında mühafizə əməkdaşlarının sayı artırılıb və təhlükəsizlik ciddi nəzarətə götürülüb»-deyə konsulluqdan bildirilib.
