Bu il “Global Startup Weekend Women” (GSWW 2018) tədbirinə Bakı da qoşulacaq.
FED.az xəbər verir ki, bu barədə tədbirin yerli təşkilatçılarından biri, “NEXT Step” İnnovasiyalar Mərkəzinin direktoru Rəşad Eyvazov məlumat verib. Bildirib ki, qadınlar arasında “Boş durma, hərəkət et” şüarı altında startap yarışı keçiriləcək.
“Ölkəmizdə startap ekosistemi tədricən inkişaf etməkdədir və bu prosesə artıq xanımların da qoşulması zəruridir. “Startup Weekend Women” yarışı ötən il ilk dəfə Parisdə başlayıb və artıq bu il 30 ölkəni əhatə edən qlobal bir tədbirə çevrilib. Azərbaycanın bu layihəyə qoşulması qadınlar arasında startap, öz biznesini qurmaq, sahibkarlıq fəaliyyəti ilə məşğul olmaq kimi anlayışları möhkəmləndirərək, sahibkar qadınların sayını artıracaq”.
Qeyd edək ki, yarış bu il fevralın 9-11-də baş tutacaq. Tədbir çərçivəsində innovativ texnologiyalara əsaslanan ideyalar ilə sahibkar qadınlar, marketoloqlar, dizaynerlər və proqramçılar komanda şəklində bir araya gələrək startaplar yaradacaq və münsiflər heyəti qarşısında təqdimat edəcəklər. Yarışın qalibi olan ideya isə mart ayında Parisdə keçiriləcək Böyük Finala göndəriləcək. Eyni zamanda onlar “Next Step” İnnovasiyalar Mərkəzinin Sup.az akselerasiya proqramında iştirak etmək imkanı qazanacaq.
Qalib komandanı mütəxəssislərdən ibarət münsiflər heyəti seçəcək ki, bura Azərbaycan Respublikası Dövlət Neft Fondunun icraçı direktorunun müşaviri Nərgiz Nəsrullayeva-Müdüroğlu, ABŞ-ın Azərabycandakı səfirliyinin ictimaiyyətlə əlaqələr üzrə nümayəndəsi Karolin Savac (Caroline Savage), “Red Communications” şirkətinin təsisçisi Tatyana Mikayılova və Beynəlxalq Maliyyə Korporasiyasının ölkəmizdəki nümayəndəsi Aliyə Əzimova daxildir. Üç gün ərzində iştirakçılar mentorlardan biznes sahəsinə aid məsləhətlər və tövsiyələr alacaqlar.
Yarış haqqında ətraflı məlumatı və proqramı rəsmi internet səhifəsindən əldə edə bilərsiniz: http://communities.techstars.com/azerbaijan/baku-azerbaijan/startup-weekend/12361#event-overview
Onlayn qeydiyyat: https://www.eventbrite.com/e/global-startup-weekend-women-baku-tickets-41546778533
Oflayn qeydiyyat üçün “Next Step” İnnovasiyalar Mərkəzinə yaxınlaşa bilərsiniz. Ünvan: “AF Business House”, Nizami küç., 203B (Səməd Vurğun heykəlinin yaxınlığında).
E-mail: [email protected]
Suallarınızı “Baku Startup Weekend”in “Facebook” səhifəsinə ünvanlamaq mümkündür.
Qadınlar arasında startap yarışı olacaq – İLK DƏFƏ
12:46
26 Yan 2018
