“PMD Projects” MMC ölkəmizdə tikinti sahəsində fəaliyyət göstərən müxtəlif yaşayış binalarının, mehmanxanaların, iaşə obyektlərinin, eləcə də, kənd təsərrüfatı təyinatlı layihələrin idarə edilməsi və inkişafı istiqamətində ixtisaslaşmış qabaqcıl şirkətlərdəndir.

FED.az xəbər verir ki, əsası qoyulduğu 2018-ci ildən etibarən “PMD Projects” MMC tərəfindən icra olunan tikinti layihələrində PMI, RIBA, RICS, FIDIC, ISO kimi beynəlxalq təşkilatların standartları tətbiq olunur. Beynəlxalq standartlar çərçivəsində “PMD Projects” MMC Beynəlxalq Standartlaşdırma təşkilatı (ISO) tərəfindən hazırlanmış və dövlətlərarası miqyasda qəbul olunan idarəetmə standartlarının tələblərinə uyğunluğu nəticəsində nüfuzlu ISO 45001:2018 və ISO 14001:2015 sertifikatlarına layiq görülərək növbəti uğuruna imza atmışdır.  

Sözügedən ISO 45001:2018 və ISO 14001:2015  sertifikatlarının təltif olunması, “PMD Projects” MMC-nin sağlamlıq və təhlükəsizlik risklərinin müəyyən edilməsi, ciddi şəkildə nəzarət edilərək idarəolunması, həmçinin resurslardan daha səmərəli istifadə edilməsi, tullantıların azaldılaraq ətraf mühitin mühafizəsi üzrə beynəlxalq standartların tələblərinə cavab verdiyinin sübutudur.

Şirkətin həyata keçirdiyi layihələr çərçivəsində ciddi şəkildə tətbiq edilən sağlamlıq, təhlükəsizlik və ətraf mühit protokollarının beynəlxalq miqyasda tanınması, davamlı təkmilləşməyə sadiqliyin və peşəkar komandanın göstərdiyi böyük səyin nəticəsidir. Bu sertifikatların alınması “PMD Projects” MMC-nin fəaliyyətlərində son dərəcə əhəmiyyətli nailiyyət hesab olunaraq, peşəkar xidmətlər təqdim etmək öhdəliyini nümayiş etdirir.

Həmçinin qeyd olunmalıdır ki, Beynəlxalq Standartlaşdırma Təşkilatı (ISO)  dövlətlərarası sahədə standartları təmin etmək məqsədilə 23 fevral 1947-ci ildə təsis olunmuşdur və hazırda təşkilata 165 ölkə üzvdür. Bu da o deməkdir ki, ISO 45001:2018 və ISO 14001:2015 standartının tələblərinə uyğunluq sertifikatının əldə edilməsi bütün üzv ölkələrdə tanınır və beynəlxalq bazarlara çıxmaq üçün mühüm amillərdən biridir.