İyulun 3-ü Pirallahı adasında “PMD Group” MMC-nin baş sponsorluğu, “Triterra Baku” triatlon klubunun təşkilatçılığı, Azərbaycan Triatlon Federasiyası və Gənclər və İdman Nazirliyinin dəstəyi ilə “IronWind 70.3” turniri təşkil olunub.

FED.az xəbər verir ki, 90-dan artıq iştirakçının mübarizə apardığı yarış 3 mərhələdən ibarət olub. İdmançılar əvvəlcə 1,9 kilometr məsafəyə üzüblər. Sonra 90 kilometr məsafəyə velosiped sürüblər, sonda isə 21,1 kilometr qaçıblar. Turnirdə həm peşəkar, həm də həvəskar idmançılar fərdi və komanda şəklində iştirak ediblər.

Kişilər arasında ukraynalı idmançı Daniil Sapunov birinci, Aleksandr Mordasov ikinci, qazaxıstanlı Aleksey Sidorenko isə üçüncü olublar.

Qadınların mübarizəsində isə ilk üç yeri müvafiq olaraq, qazaxıstanlı idmançılar Dina Şaimerdenova, Aynur Kumarova və Azərbaycanın ilk və yeganə “İron Woman” idmançısı Rəbiyyə Orucova tutublar.

“PMD Group” MMC davamlı olaraq həyata keçirdiyi Korporativ Sosial Məsuliyyət tədbirləri çərçivəsində ölkəmizdə idman sahəsinin inkişafına öz töhfəsini verməklə yanaşı, əhali arasında sağlam həyat tərzinin təbliq edilməsi istiqamətində də öz fəaliyyətini genişləndirməkdə davam edir.