www.azerp.az portal təmənnasız xidmət göstərməklə onların xərclərini qənaət etməyə və səmərəliliyi artırmağa imkan yaradacaqdır. Portal Azərbaycan sahibkarlarına mütəmadi təlimlər təşkil edəcək.
FED.az xəbər verir ki, Azərbaycan Respublikası İqtisadi İslahatların Təhlili və Kommunikasiya Mərkəzi (İİTKM) www.azerp.az portalının təqdimatına həsr olunan “WWW.AZERP.AZ: MÜƏSSİSƏ RESURSLARININ PLANLAŞDIRILMASINA DƏSTƏK” mövzusunda tədbir keçirib. Portal iqtisadiyyatın rəqəmsallaşması və sahibkarlara əlavə imkanların yaradılması istiqamətində yeni bir layihədir.
Eləcə də bax: Monitoring.az portalı – MONİTORİNQ VƏ QİYMƏTLƏNDİRMƏNİN ELEKTRON MƏRHƏLƏSİ
Tədbirin açılışında İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru Vüsal Qasımlı bildirib ki, Azərbaycanda rəqəmsal transformasiya hakimiyyətin qolları, maliyyə-bank sektoru və iri müəssisələrdə daha sürətlə gedir:
“Kiçik və orta biznesin real vaxt rejimində resurslarının planlaşdırılması üçün www.azerp.az portalı yeni imkanlar təqdim edir. Sahibkarlar ERP proqram təminatından istifadə etməklə marketinq, müştəri əlaqələri, layihə idarəetməsi, insan resursları, mühasibat, anbar təsərrüfatı, satınalmalar, istehsalat kimi fəaliyyətləri vahid bir sistem vasitəsilə idarə edəcəklər. Beləliklə, ERP-nin tətbiqi ilə müəssisələrimiz idarəetmənin səmərəliliyini artıracaq, resurslara qənaət edəcək, kibertəhlükəsizliyi gücləndirəcək və ən əsası daha rəqabətqabiliyyətli olacaqlar. İİTKM-in digər layihələri – Azexport.az, Enterpriseazerbaijan.com, “Bir Pəncərə” İxraca Dəstək Mərkəzi və Rəqəmsal Ticarət Qovşağı birlikdə www.azerp.az portalı ilə bir ekosistem şəklində sahibkarlığın inkişafına dəstək verəcəklər. Eyni zamanda İİTKM digər dövlət qurumları, innovativ şirkətlər və beynəlxalq təşkilatlarla əməkdaşlıq edərək kiçik və orta biznesin rəqəmsal transformasiyasını dəstəkləyəcəkdir. Bu yolla müəssisə səviyyəsində strategiya və texnologiyaların uğurlu vəhdətini vermək mümkündür.”
Təqdimat zamanı Azexport portalının rəhbəri Zaur Qardaşov dünyada bu sahədə mövcud trendlərdən, eləcə də geniş istifadə edilən proqram təminatlarından - ERP və CRM sistemlərinin sahibkarlara və dövlətə verdiyi üstünlüklərdən və AzERP sisteminin iş prinsipi və funksional modulları haqqında tədbir iştirakçılarına geniş məlumat verib. O bildirib ki, məhz bu platformanın istifadəsi və geniş tətbiqi perspektivdə Azərbaycanın transsərhəd ticarət və xidmət əməliyyatlarının onlayn həyata keçirilməsini və qlobal ERP istifadəçiləri şəbəkəsinə qoşulmasını daha asan edəcək.
Daha sonra İqtisadi İslahatların Təhlili və Kommunikasiya Mərkəzi ilə birlikdə innovativ layihələrin həyata keçirilməsində fərqlənən qurum və şəxslər mükafatlarla təltif olunub.
Qeyd edək ki, www.azerp.az portalı dünyada getdikcə populyarlaşan açıq kodlu OpenERP sistemi əsasında qurulub. OpenERP 2000 mindən artıq professional proqramçı tərəfindən dəstəklənir və hazırda 2 mln. istifadəçisi var. AzERP web üzərindən işləyir və heç bir əlavə proqram təminatının qurulmasına ehtiyac yoxdur. Layihənin məqsədi Cloud SaaS servisi vasitəsilə sistemi Azərbaycan istifadəçiləri üçün lokallaşdırmaq, milli qanunvericiliyə uyğunlaşdırmaqla daha əlçatan etməkdir. Portal müəssisə resurslarının planlaşdırılmasına dəstək verməklə aşağıdakı funksionallıqlara malikdir: Mühasibat uçotu, HR menecmenti, istehsalın idarə edilməsi, multi kanal satışlar, satınalmalar, e-commerce, anbar idarəetmə, layihə idarəedilməsi, nəqliyyat parkının idarə edilməsi və CRM.
