Azərbaycan Sahibkarlar (İşəgötürənlər) Təşkilatları Milli Konfederasiyası (ASK) ilə Dövlət Gömrük Komitəsi (DGK) arasında Əməkdaşlıq Şurasının videoformatda növbəti iclası keçirilib.
Eləcə də bax: Büdcəyə yığılan vergi və gömrük rüsumları azaldılır – SİYAHI, MƏBLƏĞLƏR
FED.az xəbər verir ki, Komitənin Mətbuat və İctimaiyyətlə Əlaqələr İdarəsindən bildirilib ki, iclasa ASK-ın vitse-prezidenti Vüqar Abbasov və DGK sədrinin birinci müavini İsmayıl Hüseynov sədrlik edib.
Əməkdaşlıq Şurasına üzv olan tanınmış şirkətlərin rəhbərləri və Dövlət Gömrük Komitəsinin baş idarə rəislərinin qatıldığı iclasda DGK sədrinin birinci müavini İsmayıl Hüseynov COVID-19 pandemiyasının gömrük keçid məntəqələrində yaratdığı vəziyyətlə bağlı iştirakçılara məlumat verərək, dövlət başçısının rəhbərliyi ilə ticarət–təchizat zəncirinin davamlılığının və təhlükəsizliyinin təmin olunması, ölkənin ixrac və tranzit potensialının qorunub saxlanılması məqsədilə bütün zəruri dəstək tədbirlərinin görüldüyünü və hazırda sanitar epidemioloji vəziyyətin tam nəzarətdə saxlanıldığını qeyd edib. İ.Hüseynovun sözlərinə görə, ötən müddətdə ölkənin ərzaq təhlükəsizliyinin təmin edilməsi və yüklərin rahat hərəkəti üçün keçid məntəqələrində lazımi şərait yaradılıb.
Dövlət başçımızın sahibkarlara dəstəyinin və diqqətinin təzahürü olan gömrük sahəsində prosedurların asanlaşdırılması və şəffaflığın təmin olunması istiqamətində işlərin bundan sonra da davam edəcəyini vurğulayan İsmayıl Hüseynov biznes mühitinin inkişafına, gömrük xidmətlərinin sadələşdirilməsinə və tamamilə elektronlaşdırılmasına töhfə verəcək innovativ layihələrin hazırlandığını və tezliklə “Yaşıl Dəhliz” sisteminin daha da təkmilləşdirilməsini açıqlayıb.
ASK-ın vitse-prezidenti Vüqar Abbasov son bir ildə gömrük sistemində həyata keçirilən islahatların biznesin inkişafına ciddi dəstək verdiyini vurğulayıb. “Yaşıl Dəhliz” sisteminin sahibkarlar üçün yaratdığı rahatlıq və şəffaflıqla bağlı atılan addımları xüsusi qeyd edən V.Abbasov gömrük prosedurlarında sahibkarları narahat edən bəzi məsələləri diqqətə çatdırıb.
Sahibkarlardan - “Azərsun Holdinq”in idarə heyətinin üzvü Savaş Uzan inspektorların sahə üzrə mütəxəssisləşməsini (gömrük rəsmiləşdirilməsini yalnız müəyyən mal seqmentləri üzrə aparılmasını) təklif edib. Onun sözlərinə görə, eyni malların təkrar ekspertizaya göndərilməsi yüklərin gecikməsinə səbəb olur. “Veysəloğlu” Şirkətlər Qrupunun Biznesə dəstək üzrə baş direktoru İlqar Nuri ƏDV-nin tutulmasındakı mövcud prosedur ilə bağlı təkliflərini səsləndirib.
“Karantin müddətində Azərbaycanda heç bir məhsulun qıtlığı müşahidə olunmadı. Bu məsələdə sahibkarlarla yanaşı, Dövlət Gömrük Komitəsinin də böyük əməyi olub. Gərgin iş rejimindəki fəaliyyətinizə görə sizə təşəkkür edirik”, - deyən İ.Nuri malların gömrük dəyərinin müəyyən edilməsindəki yubanmalarla bağlı bir neçə məsələyə toxunub. Bundan başqa, “Helmann” MMC-nin icraçı direktoru Kamran Həbibov ehtiyat hissələrinin dəyişdirilməsinə qarantiyası olan malların dəyişdirilməsi üzrə gömrük prosedurunun təkmilləşdirilməsi, malların müvəqqəti saxlanca verilməsi, investisiya təşviqi sənədi almış layihələr üzrə ölkəyə gətirilən malların bəzilərində yaranan çətinliklər barədə Əməkdaşlıq Şurasının üzvlərinə məlumat verib.
Qaldırılan məsələlər və verilən təkliflərlə bağlı ətraflı fikir mübadiləsi aparılıb.
DGK sədrinin müavini Cavad Qasımov sahibkarların səsləndirdiyi fikirlərlə və təkliflərlə bağlı aparılan müzakirələr zamanı qərarların icrası prosesinin izlənməsinin vacibliyini vurğulayıb.
“Məcburi qərarlar sistemi qurulur və ölkəyə gələn mallar üzrə ekspertizanın cavabları sistemləşdiriləcək, nəticədə bu məsələlər aradan qaldırılacaq”, - deyən C.Qasımov sahibkarları narahat edən bütün məsələlər üzrə öz fikrini bildirib və bu cür görüşlərin ölkə iqtisadiyyatı üçün böyük əhəmiyyəti olduğunu qeyd edib.
