Bu gün “Holcim Azərbaycan” ASC-nin fiziki şəxs səhmdarları şirkətin Qaradağ rayonu Sahil qəsəbəsində yerləşən sement zavodunun qarşısında toplaşıblar. ASC-nin fiziki şəxs səhmdarları 20 ildir sahib olduqları səhmlərə görə dividend ala bilməməkdən şikayətlənirlər. Hər bir fiziki şəxs səhmi və indiyədən ödənilməyən dividendlərin qarşılığında 125 min manat tələb edir.
Özlərinin də səhmdar olduqlarını bildirən bir neçə şəxs səhmdarların Mayın 17-də zavoda toplaşmasını təşkil edib və onların adından (səhmdarların nümayəndələri olaraq) “Holcim Azərbaycan”ın rəhbərliyi ilə görüşüblər.
FED.az xəbər verir ki, danışıqlarda səhmdarların nümayəndələrinə bildiriblər ki, “Holcim Azərbaycan” ASC kredit borcuna malik olduğundan dividend ödəyə bilməyəcəkdir. ASC-nin rəhbərliyi qeyd edib ki, zavodun istehsalı artır, satış gəlirləri yüksəlir. Yaxın illərdə kredit borcu tam bağlanacaq və dividendlərin ödənilməsi bərpa ediləcəkdir.
Bəzi səhmdarlar öz səhmlərini satmaq istəyirlər. Belə səhmdarların istəyi də zavod rəhbərliyinin diqqətinə çatdırılıb. Zavod rəhbərliyi həmin səhmdarların siyahısının hazırlanmasını təklif edib və onların səhmlərinin digər investorlara təklif edilməsində kömək göstərəcəkləri sözünü veriblər.
"Holcim Azərbaycan”ın rəhbərliyi ilə görüşdən öncə, “Danışıqlardan nəticə çıxmasa Avropa məhkəməsinədək gedəcəyik” deyən təşkilatçılar görüşdən sonra sakit danışıblar. Görüşdən qayıdan təşkilatçı nümayəndələr zavodun qarşısında gözləyən səhmdarlara bildiriblər ki, ümidlərini itirməsinlər, danışıqların davam etdirilməsi qərarlaşdırılıb. Təxminən 2 həftədən sonra növbəti görüşün keçirilməsi razılaşdırılıb.
Zavodun qarşısna toplaşan səhmdarlar “20 ildir gözləyirik, 2 həftə də gözələyək” deyərək dağılışıblar.
Qeyd edək ki, keçmiş "Qaradağ Sement Zavodu"nun varisi olan "Holcim Azərbaycan” ASC-nin 1999-cu ildən açıq səhmdar cəmiyyətidir.
8 MİLYON MANAT MƏNFƏƏTİ OLSA DA, DİVİDEND ÖDƏMƏYƏCƏK
Xəbər verdiyimiz kimi, 4 aprel 2019-cu il tarixində Bakı şəhərində "Hyatt Regency" mehmanxanasında "Holcim Azərbaycan" Açıq Səhmdar Cəmiyyəti səhmdarlarının İllik Ümumi Yığıncağı keçirilib. Yığıncaqda bildirilib ki, şirkət ötən ili 8 milyon manata yaxın xalis mənfəətlə başa vurub.
Bununla belə, səhmdarlar ötən il olduğu kimi, bu il də dividend almayacaqlar. Çünki, əldə edilmiş mənfəət yenə də, manatın 2015-ci ildəki kəskin devalvasiyası nəticəsində zavoda dəymiş zərərin nəticələrinin aradan qaldırılmasına, başqa sözlə, səhmdar cəmiyyətinin kapitalının artırılmasına yönəldiləcək.
Xatırladaq ki, "Holcim Azerbaijan" 2000-ci ildə yaradılıb və ölkənin ən iri sement istehsalçısıdır. Onun nizamnamə kapitalı 31 812 880 manatdır. Şirkətin səhmlərinin 86%-i İsveçrənin “Lafarge Holcim” və "Holcim Auslandbeteiligungs GmbH.” şirkətlərinə (müvafiq olaraq 76% və 10%), 14%-i isə fiziki şəxslərə məxsusdur.
