Gəncə Avtomobil Zavodu (GAZ) İtalyanın SDF qrupu ilə uzunmüddətli strateji əməkdaşlıq müqaviləsi imzalayıb.
Zavoddan FED.az-a verilən məlumata görə, Gəncə Avtomobil Zavodu İsteslalat Birliyinin rəhbərliyi Avropada, həm də dünyanın kənd təsərrüfatı bazarında öz keyfiyyəti və davamlılığı, yüksək məhsuldarlıq xüsusiyyətləri ilə seçilən traktorlarların istehsalçısı olan İtaliyanın «SDF Group»unda rəsmi səfərdə olub.
Birliyin müşahidə şurasının sədri Xanlar Fətiyevin rəhbərlik etdiyi nümayəndə heyəti İtaliyanın Treviglio şəhərində «SDF Group»da texnikalarla, onların keyfiyyəti və yığım şəraiti ilə tanış olub.
İtalyan şirkətinin rəhbərliyi ilə keçirilən ikitərəfli görüş zamanı uzun müddətli strateji əməkdaşlıq şərtləri müzakirə edilib.
Söhbət zamanı qeyd olunub ki, SDF qrupun istehsal etdiyi kənd təsərrüfatı texnikalarına Azərbaycanda olan marağı nəzərə alaraq Gəncədə əməkdaşlıq müqaviləsi imzalanıb.
Müqavilənin şərtlərinə görə Gəncə müəssisəsi DEUTZ-FAHR 4100 W, 6205 g və 115 G AGROFARM modellərinin yığımını həyata keçirəcək. SFD qrupun ofisində bağlanan uzunmüddətli strateji əməkdaşlıq müqaviləsini Gəncə avtomobil zavodu İB-nin müşahidə şürasının sədri Xanlar Fətiyev və İtalyanın SDF qrupunun kommersiya direktoru Alessandro Maritano imzalayıb.
Müqavilə Gəncə avtomobil zavoduna burada yığılan texnikaların Azərbaycan bazarı ilə yanaşı üçüncü ölkələrə də satmaq hüququ da verəcək:
«Gəncə avtomobil zavodu İB-i artıq uzun müddətdir ki, avtomobillərin və kənd təsərrüfatı texnikalarının yığımı sahəsində yetərincə ixtisaslaşmış müəssisədir. Zavodun həm texniki şəraiti, həm də işçi potensialı istənilən model texnikanın yığımını həyata keçirməyə imkan verir. SDF qrupun müxtəlif modifikasiyalarda olan DEUTZ-FAHR traktorları da hesab edirəm ki, müəssisəmizdə çox yüksək səviyyədə yığılacaq və Azərbaycan bazarında böyük marağa səbəb olacaq. Hələlik ilkin mərhələdə 3 modelin yığılması nəzərdə tutulur. Gələcəkdə bazarın tələbinə uyğun olaraq DEUTZ-FAHR-ın müxtəlif model traktorlarını da yığmağı planlaşdırırıq» deyə Xanlar Fətiyev əlavə edib.
Qeyd edək ki, 2004-cü ildən fəaliyyətə başlayan Gəncə avtomobil zavodu 2007-ci ildən bəri müəssisədə 15 000-ə yaxın müxtəlif modeldə və modifikasiyada traktorlar və digər kənd təsərrüfatı texnikaları yığaraq təhvil verilib. Bu müddətdə zavodda 5000-dən yuxarı müxtəlif markalı və müxtəlif modeldə yük avtomobilləri yığılıb.
