Azərbaycan Respublikasının Çin Xalq Respublikasındakı səfirliyi üçün paytaxt Pekində ayrılmış torpaq sahəsində inşa olunacaq binanın təməlqoyma mərasimi keçirilib.
FED.az xəbər verir ki, Pekinin ən yaxşı və işgüzar hissələrindən birində, ABŞ, Fransa, İsrail, Yaponiya və digər ölkələrin diplomatik nümayəndəliklərinin yerləşdiyi “Lianmaçiao” diplomatik zonasında inşa ediləcək bina Azərbaycanın xaricdəki ən böyük səfirlik binalarından biri olacaq. Binanın layihəsini hazırlayan memarlar əvvəlcədən Bakıya səfər edərək, Azərbaycanın tarixi və müasir memarlıq nümunələri ilə tanış olublar. Layihə tərtib edilərkən binanın dizayn və interyerində Azərbaycan memarlıq elementləri əksini tapıb. Müasir tələblərə cavab verəcək binada səfirlik əməkdaşlarının fəaliyyəti üçün hər cür şərait yaradılacaq.
Təməlqoyma mərasimində çıxış edən Azərbaycan xarici işlər nazirinin müavini Ramiz Həsənov iki xalq arasında böyük tarixi olan dostluq münasibətlərinin müasir dövrdə dövlət başçılarının siyasi iradəsi ilə bütün sahələrdə inkişaf etdiyini deyib. Möhkəm özül üzərində qurulan münasibətlərimizin inkişafında ümummilli lider Heydər Əliyevin və Prezident İlham Əliyevin Çin Xalq Respublikasına səfərləri və bu çərçivədə əldə edilmiş razılaşmalar böyük rol oynayıb. Bu xüsusda Azərbaycan Prezidentinin ötən ay Pekində keçirilmiş 2-ci “Bir kəmər, bir yol” beynəlxalq əməkdaşlıq forumunda iştirakı xüsusi qeyd olunmalıdır. Səfər zamanı iki ölkənin dövlət başçıları arasında dostluq və səmimiyyət şəraitində keçirilmiş görüşdə əldə edilmiş razılaşmalar “Bir kəmər, bir yol” çərçivəsində ölkələrimiz arasında gələcək əməkdaşlığımız üçün yeni hədəfləri müəyyən edib.
Münasibətlərimizin inkişaf dinamikasının Azərbaycanın Pekindəki səfirliyinin yeni binasının tikilməsi zərurətini yaratdığını bildirən R.Həsənov, bu binanın öz müasir memarlığı, milli çalarları və əzəməti ilə ölkəmizin Çin ilə münasibətlərinə verdiyi önəmi və əlaqalərimizin hazırkı yüksək səviyyəsini göstərəcəyini deyib. Yeni bina daha böyük nailiyyətlər əldə edilməsi üçün Azərbaycan səfirliyinin iş şəraitini və təmsilçilik imkanlarını artıracaq, eləcə də Azərbaycan-Çin dostluğunun rəmzlərindən birinə çevriləcək.
Çin xarici işlər nazirinin müavini Can Hanhuy Çin hökuməti adından əlamətdar hadisə münasibətilə təbriklərini çatdırıb. Azərbaycan səfirliyi üçün binanın Pekinin ən yaxşı ərazilərindən birində ayrılmasının Çin-Azərbaycan münasibətlərinin yüksək səviyyədə olmasından xəbər verdiyini bildirən nazir müavini xalqlarımızın dostluğunun köklərinin uzaq keçmişə gedib çıxdığını, tarixi İpək Yolunun bizim ölkələri birləşdirdiyini diqqətə çatdırıb. Hələ XIII əsrdə dahi Azərbaycan şairi və mütəfəkkiri Nizami Gəncəvi “Yeddi gözəl” poemasında Çin gözəlini vəsf edib.
Hazırda Azərbaycan-Çin münasibətlərinin bütün sahələrdə inkişaf etdiyini bildirən Can Hanhuy, bu ilin aprelində Prezident İlham Əliyevin Çinə səfəri çərçivəsində ÇXR Sədri Si Cinpin ilə görüşündə yaxın dost olan ölkələrimizin ikitərəfli münasibətləri, onların gələcək inkişafı barədə müzakirələr apardıqlarını diqqətə çatdırıb. Çinin irəli sürdüyü “Bir kəmər, bir yol” strategiyası çərçivəsində ölkələrimiz arasında fəal əməkdaşlıq həyata keçirilir.
Ölkəmizin Çindəki səfiri Əkrəm Zeynallı Azərbaycan hökumətinin Pekindəki səfirlik binasının inşası ilə bağlı qərarından sonra torpaq sahəsinin ayrılması, ilkin icazələrin alınması, layihə-dizayn və tikinti şirkətlərinin müəyyənləşdirilməsi, müxtəlif qurumlarla əlaqələndirmənin aparılmasına və buna bənzər onlarca məsələlərdə göstərdiyi dəstəyə görə Çin tərəfinə minnətdarlıq edib.
Mərasimdə Azərbaycan incəsənət ustalarının ifasında konsert proqramı təqdim olunub.
Qeyd edək ki, Azərbaycan səfirliyinin binası üçün 3000 kvadratmetr sahə ayrılıb. Binanın layihəsini “Hongshi” dizayn şirkəti hazırlayıb, inşaatı isə Pekində yaxın vaxtlarda istifadəyə veriləcək və dünyada ən böyük aeroport olacaq “Dasin” hava limanı, paytaxtın rəmzlərindən Milli Böyük Teatr da daxil olmaqla Çində həyata keçirdiyi iri tikinti işləri ilə müsbət imic qazanmış “Beijing Urban Construction Sixth Group” həyata keçirəcək.
