Biznes

Bu ilin ilk rübündə əmək müqavilələrinin sayı - 66 MİN ARTIB

Bu ilin ilk rübündə əmək müqavilələrinin sayı - 66 MİN ARTIB | FED.az
20:08 4 Aprel 2019

Azərbaycan Respublikasının Prezident İlham Əliyevin sosial-iqtisadi siyasətinə uyğun olaraq, ölkədə yeni iş yerlərinin açılması və məşğulluq imkanlarının artırılması daimi xarakter alıb.

Bu proses, eyni zamanda dövlət başçısının müvafiq Sərəncamı ilə minimal əmək haqqının artması, qeyri-rəsmi məşğulluğun leqallaşmasının stimullaşdırılmasına yönələn təsirli tədbirlər, xüsusən özəl sektorda tətbiq olunan yeni vergi-sığorta güzəştləri əmək müqavilələrinin sayında növbəti artıma imkan verib.

Əmək və Əhalinin Sosial Müdafiəsi Nazirliyindən Trend-ə verilən məlumata görə, əmək müqaviləsi bildirişi üzrə elektron informasiya sisteminin məlumatlarına əsasən 2019-cu ilin yanvar-mart aylarında qeydiyyata alınmış əmək müqavilələrinin sayı (hərbi qulluqçular, xüsusi rütbəli şəxslər və əmək müqavilələri kağız üzərində bağlananlar istisna olmaqla) 66 min artıb. Onlardan 47 500-ü özəl, qalanı dövlət sektorunda bağlanıb.

Əmək müqaviləsi əsasında çalışmaq işçinin gələcək sosial təminat hüququna əsas yaradır, ona həyatının, sağlamlığının və əməyinin mühafizəsini təmin edən əmək şəraitində işləmək, minimum əmək haqqından aşağı olmayan əmək haqqı almaq və s. kimi hüquqlar verir. Həmçinin əmək münasibətlərinin əmək müqaviləsi əsasında qurulması vergi və sosial sığorta daxilolmaları baxımından xüsusi önəm kəsb edir.

Xatırladaq ki, ötən il əmək müqavilələrinin sayında 91,3 min artım qeydə alınmışdı.

Digər xəbərlər

Banner