Oktyabrın 15-dən noyabrın 15-dək keçiriləcək İkinci Bakı Şopinq Festivalı bir çox yeniliklərlə əvvəlki festivaldan fəqrlənəcək. FED.az xəbər verir ki, budəfəki festivalda 400-dən artıq ticarət obyektinin iştirakı gözlənilir.
Mədəniyyət və turizm naziri Əbülfəs Qarayev bildirib ki, Şopinq Festivalında həm turistlər, həm də yerli alıcılar üçün yeni imkanlar nəzərdə tutulub: "Mağazaların və xidmət mərkəzlərinin əksəriyyətinin əlavə dəyər vergisinin qaytarılması sisteminə qoşulması ilə turistlər və yerli alıcılar üçün böyük fürsətlər təqdim olunacaq. Budəfəki festival bir çox yeniliklərlə alıcıların görüşünə gələcək. Belə ki, ilk dəfə olaraq supermarketlər də festivala qoşulmağa qərar veriblər. Bunlar “Bravo” hipermarketi və “Neptun” supermarketidir. Bundan əlavə, bir sıra apteklər də festivala qoşulacaq”, - deyə nazir bildirib.
Qeyd edilib ki, festival xüsusi turist paketləri hazırlayaraq turizm agentliklərinə təklif edəcək. Bu paketlərə aviabilet, transfer, sığorta, oteldə qalma, festival mağazalarına şopinq turların təşkili daxildir. Alıcılar festival boyunca xüsusi hədiyyə kartları qazanacaq, eləcə də xüsusi uduşlu lotereyalar və endirim kuponları əldə edəcəklər. Turistləri və alıcıları həvəsləndirmək üçün ticarət mərkəzlərində interaktiv oyunlar təşkil olunacaq. Festival boyunca Fəvvarələr meydanında “Fan” zonası fəaliyyət göstərəcək.
Diqqətə çatdırılıb ki, əgər Birinci Şopinq Festivalında tərəfdaş qismində çıxış edən müəssisələrin sayı 33 idisə, budəfəki festivalda 111 olacaq. Bu da üç dəfə artım deməkdir.
Nazir bildirib ki, Birinci Şopinq Festivalında əlavə dəyər vergisini cəmi 72 şirkət qaytarıb. Budəfəki festivalda isə 467 müəssisənin əlavə dəyər vergisini qaytarması nəzərdə tutulur. Payız aylarında keçiriləcək festivala ümumilikdə 578 müəssisə qatılacaq. Qaydalar necə var elə də qalacaq. Turistlərin sayının artımı ilə əlaqədar nağdsız ödəmələr 93 faiz artaraq 703 milyon manat olub. Nağdsız ödənişlərin stimullaşdırılması olduqca önəmlidir.
Qeyd edilib ki, festival çərçivəsində xüsusi mükafatlar təsis ediləcək. Bu da alış-verişin əhəmiyyətini artıracaq. “Gələcəkdə keçiriləcək növbəti festivallarda ölkəmizə gələcək turistlər üçün xüsusi imtiyaz kartının hazırlanması da nəzərdə tutulur”, - deyə Ə.Qarayev diqqətə çatdırıb.
İkinci Şopinq Festivalının keçirilməsi üçün Vergilər Nazirliyi bütün qüvvəsini səfərbər edəcək. Budəfəki festival keçəndəfəki festivaldan fərqli olacaq.
Bunu isə vergilər nazirinin müavini Sahib Ələkbərov deyib. Nazir müavini bildirib ki, bu festivalın təşkili üçün Vergilər Nazirliyi müvafiq iş rejimində çalışacaq. Nazirliyin 30 əməkdaşı iki növbədə işləyəcək. Bir sözlə, Vergilər Nazirliyi operativ olaraq festivala tam hazırdır.
Diqqətə çatdırılıb ki, budəfəki festivala artıq iki bank - AzərTürk Bank və Azərbaycan Beynəlxalq Bank xidmətlərini təklif edib.
Bakı Şəhər İcra Hakimiyyəti başçısının müavini Fidumə Hüseynova və Azərbaycan Konqreslər Birliyinin icraçı direktoru Ülviyyə Mirqasımova festivalın ölkəmiz üçün önəmindən danışıblar.
Bildirilib ki, festival günlərində ölkəmizə turist axını daha da çoxalacaq. Festival çərçivəsində Azərbaycanın yüngül sənaye məhsullarının da realizə ediləcəyi qeyd olunaraq xarici ölkə vətəndaşlarının bu şəraitdən yüksək səviyyədə yararlana biləcəyi vurğulanıb. Həmçinin festivalın ticarət və nəqliyyat sahəsinə də böyük təsir göstərəcəyi diqqətə çatdırılıb.
Mətbuat konfransında məlumat verilib ki, sahibkarlar festivalın rəsmi internet saytında qeydiyyatdan keçərək iştirakçı statusu almaqla öz məhsullarını festival zamanı paytaxtımıza gələcək minlərlə turistə və yerli əhaliyə təqdim etmək imkanı qazana bilərlər.
