Caspian Energy Club ikinci “CEO Award Azerbaijan” milli müsabiqəsinə start verib.
FED.az-ın məumatına görə, bu barədə Caspian Energy Club-un sədri və qrupun baş icraçı direktoru Telman Əliyev məlumat verib.
O qeyd edib ki, ötən il olduğu kimi ikinci “CEO Award Azerbaijan” milli müsabiqəsinə rəsmi dəstək AZPROMO və KOBİA tərəfindən göstərilir.
“CEO Award Azerbaijan” milli müsabiqəsinin keçirilməsində əsas məqsəd Azərbaycanın dövlət və özəl sektorlarında fəaliyyət göstərən, sosial mediada tanınan top-menecerlər müəyyənləşdirilməsidir. Həmçinin biz kiçik və orta biznes nümayəndələri haqqında məlumatları geniş ictimaiyyətə çatdırmaq istəyirik”, - deyə Telman Əliyev qeyd edib.
Qalib top-menecerlər 14 fevral - 5 mart tarixində www.ceo.award.az saytında keçiriləcək onlayn səsvermə yolu ilə müəyyən ediləcəklər. Səsvermə həm ölkə daxilində, həm də onun hüdudlarından kənarda keçiriləcək.
Səsvermənin nəticələri 10 mart tarixində "CEO Award Azerbaijan" müsabiqəsinin təltifetmə mərasimi çərçivəsində səsləndiriləcək.
Sıralarında 50 ölkədən 5000-dən çox şirkət və təşkilatı birləşdirən Caspian Energy Club 2002-ci ilin iyununda yaradılıb. “Biznes-hökumət” dialoqunun fəal iştirakçısı olan Caspian Energy Club-ın əsas məqsədi Azərbaycanda və Caspian Energy Club - ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.
“Biznes-networking” üçün beynəlxalq platforma olan Caspian Energy Club mütəmadi olaraq müxtəlif tədbirlər təşkil edir. Mənzil-qərargahı Bakıda yerləşən Caspian Energy Club - un Türkiyə, BƏƏ, İsrail, Özbəkistan, Gürcüstan və Qazaxıstanda rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.
