2017-ci ilin yanvar-noyabr aylarında Azərbaycan Gürcüstandan 111 522 şüşə şərab idxal edib.
FED.az xəbər verir ki, APA-nın yerli bürosunun Gürcüstanın Kənd Təsərrüfatı Nazirliyinə istinadən yaydığı məlumata görə, bu, ötən ilin eyni göstəricisindən 67% çoxdur.
Cari ilin 11 ayı ərzində Gürcüstan 52 ölkəyə 70,2 milyon şüşə şərab ixrac edib ki, bu da ötən ilin analoji dövrü ilə müqayisədə 54% çoxdur. Qonşu ölkənin hesabat dövründə şərab ixracından gəliri 49% artaraq 154,8 milyon dollar təşkil edib.
Gürcü şərabını ən çox idxal etmiş ölkələrin ilk beşliyinə Rusiya (43 903 947 şüşə), Ukrayna (7 660 334), Çin (6 736 081), Qazaxıstan (3 096 879) və Polşa (2 388 352) daxildir.
