Dünya Bankı (DB) 2020-ci ildə Azərbaycana 150 milyon dollara yaxın məbləğdə kreditin ayrılmasını təsdiq edə bilər. Bu barədə bankdan məlumat verilib.
FED.az xəbər verir ki, "hazırda DB ilə Azərbaycan hökuməti arasında iki layihənin maliyyələşdirilməsi ilə bağlı danışıqlar aparılır. Bank bu layihələrin həyata keçirilməsi üçün 150 milyona dollara yaxın məbləğdə kredit ayıra bilər. Maliyyələşmənin 2020-ci ildə təsdiqlənməsi planlaşdırılır", - deyə məlumatda bildirilir.
Xüsusilə DB məşğulluğun dəstəklənməsi üçün 100 milyon həcmində kredit ayırmağı planlaşdırır. "Bu layihə üçün kreditlə bağlı rəsmi danışıqlar gələn ilin yanvar ayına, kreditin təsdiqlənməsi isə 2020-ci ilin birinci yarısına planlaşdırılıb", - deyə məlumatda qeyd olunur.
Bundan başqa, DB Azərbaycanın ədliyyə sistemində islahatların davam etdirilməsi üçün əlavə olaraq 50 milyon dollara yaxın məbləğdə kredit ayırmağı planlaşdırır.
“Rəsmi danışıqlar gələn ilin birinci rübünün sonunadək, kreditin təsdiqlənməsi isə gələn il ərzində baş tuta bilər. Kredit vəsaitlərinin elektron məhkəmə sisteminin inkişafına, müvafiq İT avadanlıqlarının alınmasına yönəldilməsi nəzərdə tutulur", - deyə bankdan vurğulayıblar.
Məşğulluğa dəstək layihəsi Azərbaycan əhalisinin iş axtaran həssas qrupları: gənclər, qadınlar, məcburi köçkünlər, əlillər və təhsil səviyyəsi aşağı olan insanlar arasında məşğulluqla bağlı vəziyyətin yaxşılaşdırılmasına yönəldilib.
Layihə üç komponentdən ibarət olacaq: özünüməşğulluq proqramının əhatə dairəsi və səmərəliliyinin artırılması; işlə təmin etmə xidmətlərinin həyata keçirilməsi üçün Dövlət Məşğulluq Xidmətinin potensialının gücləndirilməsi; layihənin idarə edilməsi, monitorinq və qiymətləndirmə.
Azərbaycan 1992-ci ildən DB-nin üzvüdür. Bu günədək bank 54 layihənin həyata keçirilməsi üçün respublikaya ümumilikdə 3,4 milyard dollar məbləğində kredit ayırıb.
“İnterfaks-Azərbaycan”
