2 mart 2022-ci il tarixində Azərbaycanda Amerika Ticarət Palatasının (AmCham Azərbaycan) Direktorlar Şurası və Prezidentliyinə seçkilər keçirilib.
FED.az xəbər verir ki, seçkilərin nəticəsinə əsasən Nərgiz Nəsrullayeva-Müdüroğlu AmCham Azərbaycanın ilk qadın prezidenti seçilib.
Nərgiz Nəsrullayeva-Müdüroğlu Harvard Kennedi Məktəbinin məzunudur və dövlət-özəl sektorda rəhbər vəzifələrdə 25 təcrübəyə malikdir. Hazırda Landmark Biznes Mərkəzini təmsil edir. O, həmçinin 45 milyard dollarlıq aktivi olan Azərbaycan Dövlət Neft Fondunun (ADNF) icraçı direktorunun müşaviri vəzifəsində çalışır.
Xanım Nəsrullayeva-Müdüroğlu dövlət sektorunda fəaliyyətə başlamazdan öncə 11 il AmCham Azərbaycanın İcraçı direktoru vəzifəsində çalışıb və Palatanın inkişafında mühüm rol oynayıb. Həmin dövrdə Palatanın üzvlərinin sayı 90 şirkətdən 300-ə çatmış, üzvlər üçün xidmətlərin dairəsi genişlənmiş və inkişaf etmişdir. Bundan əlavə, o, Palatanın siyasətini və qanunvericilik işini gücləndirərək AmCham Azərbaycanı biznesin real səsi və ölkənin iqtisadi inkişafında müsbət qüvvəyə çevirməyə nail olmuşdur.
Yaxşı işgüzar nüfuza malik Palata üzvlərinin səlahiyyətli nümayəndələrinin iştirak etdiyi seçkilərin nəticəsinə əsasən aşağıdakı şəxslər növbəti iki il müddətinə (2022-2024-cü illər) AmCham Azərbaycanın Direktorlar Şurasına seçiliblər:
- AmCham prezidenti Nərgiz Nəsrullayeva-Müdüroğlu, Landmark Biznes Mərkəzi
- Şahin Məmmədov, PASHA Holdinq
- Zaur Allahverdizadə, BAKER HUGHES
- Dəyanət Sədullayev, PMD Group
- Rəna Məmmədova, COCA-COLA
- Teymur Mahmudov, SOCAR
- Elnarə Məmmədova, BP
- Kənan Tabasaranski, Smart Solutions Group
- İlqar Mehti, EKVITA
- Bəxtiyar Axundov, MOL Azərbaycan
Qeyd edək ki, AmCham Azərbaycan 1996-cı ildən ölkədə fəaliyyət göstərir və hazırda ölkədəki xarici investisiyaların 80%-dən çoxunu təmsil edən 250 üzv şirkəti özündə birləşdirir. Palata hökumətlə özəl sektor arasında körpü rolunu oynayır və müvafiq dövlət qurumları ilə davamlı konstruktiv və nəticəyönümlü dialoq aparır. Palata üzvlərinin biznes maraqlarını təşviq edir və Azərbaycanda biznes mühitinin yaxşılaşdırılmasına töhfə verir.
