Türkiyəli satış mütəxəssisi: “Şirkətin qazancı 50 deyil, 20 faiz olar, amma mütləq endirimlərdən gəlir əldə edər”
Əvvəllər endirim olanda, mağazaların içərisinin dolu olduğunu, qarşısında növbələri görərdik. İndi artıq endirimlər insanları mağazalara çox da çəkmir. Endirimlərin real olmadığını düşünənlər də çoxdur. Niyə endirimlər əvvəlki effekti vermir?
Eləcə də bax: Pandemiyada yaranmış, 3 karantin, 1 müharibə görmüş - 2 XANIMIN BRENDİ - MÜSAHİBƏ
Türkiyənin “Madame Coco” şirkətinin Azərbaycandakı şöbəsinin Satış və marketinq departamentinin rəhbəri Ahmet Kandemir FED.az-a bildirib ki, beynəlxalq, korporativ brendlərin endirimləri realdır: “Endirim qiymətləri normal satış qiymətlərindən həqiqətən ucuz olur. Buna görə xalqı aldatmaq barədə bir fakt yoxdur”.
Endirimlərin insanlarda əvvəlki qədər maraq oyatmamasının səbəblərinə gəlincə, A.Kandemir bildirdi ki, müxtəlif faktorlar buna gətirib çıxarıb: “Çünki bu endirimlər artıq endirim olmaqdan çıxıb. İnsanlar əvvəllər endirim üçün bayramları gözləyərdilər. Fevralda “Sevgililər günü”, martda “Qadınlar günü”, Novruz bayramı, dekabrda Yeni il ərəfəsini gözləyirdilər ki, böyük endirimlər olsun, o vaxt alış-veriş etsinlər. Amma pandemiyadan sonra bazarda satışla bağlı problemlər olduğu üçün artıq bu endirimlər ildə 3-4 dəfə əvəzinə, demək olar ki, hər ay edilir. Davamlı olaraq baş verən proses halına gəldiyi üçün insanlarda əvvəlki təsirini itirdi.
Digər səbəb xaricdən məhsul gətirilməsinin asanlaşmasıdır. Adam daha münasib qiymətə xaricdən istədiyi məhsulları sifariş verə bilir. Yaxud baxır ki, bu məhsul bu qiymətədir, onu Türkiyədən sifarişlə gətirsə, endirimdən də münasib qiymətə düşür. Təbii ki onlayn almağa üstünlük verir. Türk lirəsinin dəyərinin düşməsi də çox təsir etdi. Türkiyədən məhsulu daha uyğun qiymətə gətirmək adi vətəndaşlar üçün daha rahat hala gəldi. O səbəbdən də endirimlər əvvəlki mənasını itirdi”.
A.Kandemirin sözlərinə görə, endirim kampaniyaları ildə 4-5 dəfədən artıq olmamalıdır: “Hər ay etdikdə, endirim olmaqdan çıxır. Müştərilər düşünür ki, qısa müddət sonra yenə endirim olacaq, indi almağı sonraya saxlayır, sonra da qalır. Ona görə çox tez-tez endirim etmək effektli deyil”.
Mağazalar endirimlərdən “gəlir əldə etmirik” kimi fikirlər də səsləndirirlər. A.Kandemir deyir ki, gəlir faizi aşağı düşə bilər, ancaq gəlirsiz endirimə gedilmir: “Xeyr, heç bir şirkət ziyana gedib endirim, satış etməz. Ola bilər ki, əvvəl bu məhsula görə 40-50 faiz gəlir qazanırdı, indi maksimum 20 faiz gəlirlə satış edər. Yəni şirkətin qazancı 50 deyil, 20 faiz olar, amma mütləq endirimlərdən gəlir əldə edər”.
Bəs endirim şirkətlərə nə qazandırır ki, buna gedirlər? A.Kandemir bununla bağlı da danışdı: “İlk olaraq müştərinizin rəqiblərə getməsinin qarşısını alır. Digər məqam isə məhsulun maliyyəsinin zamanında çıxarılmasının önəmliliyidir. Mağaza o məhsulu alır, ya pulu nağd ödəyir, ya da 60-90 gün içərisində. Mağaza o məhsulun pulunu ödəyəndən sonra o məhsulun mağazada qalması onun üçün zərərdir. Tezliklə satmalıdır. Məhsulun 120-150 gün içərisində rəfdən çıxması lazımdır. Satılmalıdır. 10 manatlıq məhsulu 20 manata satmaq üçün 6 ay gözləyincə, 3-4 ayın sonunda 15-16 manata satmaq daha sərfəlidir. Nağd dövriyyəsini təmin etmək üçün bu lazımdır”.
“70 faizə qədər endirim” yazılır, mağazaya daxil olanda, görürsən ki, cəmi 3-4 məhsulda o endirim var, qalanlarında endirim azdır. A.Kandemir deyir ki, bunu yanlış üsul adlandırmaq da olmaz: “Endirim həqiqi endirim olmaqla bərabər marketinq strategiyası olaraq istifadə edilir. “70 faizə qədər” söhbətinə gəlincə, o bir marketinq strategiyası, müştərinin ayağını mağazaya atdırmaq üçün üsuldur. O strategiya ilə daha çox müştəri cəlb edilir. Yalanmı? Xeyr. 70 faiz endirim etdiyi məhsul da var”.
