Banner

Biznes tarixi

Almaniyada 7 zavodun meneceri olan azərbaycanlı – MÜSAHİBƏ

Almaniyada 7 zavodun meneceri olan azərbaycanlı – MÜSAHİBƏ | FED.az
09:07 29 Aprel 2021

Alim Quliyev: Amazon”da işə götürülərkən 14 müsahibədən keçmişdim

Eləcə də bax: “Kanadada 6 şirkətdə çalışmışam, heç birində diplomumu soruşmayıblar” - UĞUR HEKAYƏSİ

İndiyə qədər bir neçə işə müraciət edib cavab gözləmək təcrübəsi yaşamayıb. Yəni o, işləri deyil, işlər onu tapıb. Bunu təhsillə, işinə məsuliyyətlə yanaşmaqla və dünyagörüşü ilə əlaqələndirir. «Birinci insan özü nəsə əldə etməlidir, sonra işəgötürəndən nələrsə tələb edə bilər» - deyir.

Eləcə də bax: Kiçik şirkətlərdən «yox», «Amazon»dan «hə» cavabı alan azərbaycanlı – MÜSAHİBƏ

FED.az “Holcim” şirkətinin Almaniya şöbəsində avadanlıqların etibarlılığı üzrə menecer vəzifəsində çalışan azərbaycanlı Alim Quliyevlə müsahibəni təqdim edir.

Qeyd edək ki, A.Quliyev 1980-ci ildə Sabirabad rayonun Quruzma kəndində anadan olub. Orta təhsilini həmin kənddə yerləşən məktəbdə alıb. Йяни Алимин щяйат йолу Сабирабаддакы вя Азярбайъандакы минлярля эянъин щяйатындан фярглянмяйяъякди.

Амма о Azərbaycan Dövlət Texniki Universitetinin maşınqayırma və material emalı (Mexanika mühəndisliyi) fakültəsində bakalavr, magistr və doktorantura təhsili alıb. Texnika üzrə fəlsəfə elmləri doktorudur.        

- Alim bəy, “Holcim Azərbaycan” da uzun müddət çalışdıqdan sonra “Amazon Almaniya”da işləməyə başlamısınız. 2 ilə yaxın orda işlədikdən sonra isə iş yerinizi “Holcim Almaniya”ya dəyişmisiniz. Bu iş dəyişmə prosesiniz necə oldu?

- Mən Bakıda magistr təhsili aldığım vaxt - 2003-cü ildə “Qaradağ Sement” şirkəti  (İndiki “Holcim Azərbaycan”) bir layihə həyata keçirirdi. Bu layihəyə əsasən magistr pilləsində mexanika mühəndisliyi təhsilini bitirmək üzrə olan magistrantlar işə cəlb olunurdu. Son kursda təhsil alan magistrları imtahan yolu ilə şirkətə işə götürürdülər. İmtahandan uğurla keçən bir neçə nəfərdən biri də mən oldum. 2014-cü ilə qədər şirkətin təmir şöbəsində müxtəlif vəzifələrdə çalışdım. 2014-cü ildə şirkət, həm Almaniyadakı zavodlarda ixtisasımı artırmaq, həm də Almaniyadakı zavodların təmir sisteminə yardım etmək üçün məni “Holcim Almaniya”ya  göndərdi. 2 il Almaniyada müxtəlif vəzifələrdə çalışdıqdan sonra 2016-cı ildə “Holcim Azərbaycan”a  geri döndüm və 2019-cu ilə qədər mənə çox doğma və bir növ məktəb olan “Holcim Azərbaycan”da çalışdım. 2019-cu ildə “Amazon Almaniya”dan Avadanlıqların Etibarlılığı üzrə Menecer vəzifəsinə təklif aldım. 2019-cu il mayın 1-dən Almaniyada “Amazon” şirkətində çalışmağa başladım. İki ilə yaxın orda çalışdıqdan sonra ”Holcim Almaniya”ya qayıtdım.

- “Amazon” da böyük şirkətdir. Niyə onu “Holcim Almaniya” dəyişdiniz?

- İş yerini dəyişməyə qərar vermək o qədər asan olmadı. “Amazon” böyük və dinamik şirkət idi və belə məqamda qərar vermək o qədər də  asan deyil. Şirkətə qayıtmağımın səbəbi israrlı dəvət oldu. Bir müddət bu dəvəti dəyərləndirdikdən sonra təkrar “Holcim Almaniya”ya qayıtmaq qərarı verdim.

- Hazırkı işiniz nədən ibarətdir?

- Şirkətin Almaniyada əsas 7 zavodu var. Bu zavodların təmiri, texniki xidməti və etibarlılığına cavabdehlik daşıyıram.

- İşləyə-işləyə təhsili davam etdirmisiniz, fasilə verməmisiniz. İş prosesində təhsilə ehtiyac hiss edirdiniz, yoxsa əvvəldən planınız belə idi?

- Doktorantura təhsili almaq, elmi dərəcəyə sahib olmaq əvvəldən arzum idi, mənə maraqlı gəlirdi. Araşdırma aparmağa əvvəldən maraq göstərmişəm. Davam etməkdə əsas səbəb bu idi. Magistr yox, amma doktorantura təhsili dövründə işlə paralel təhsil çətin idi. Həm gündəlik iş, həm də müəyyən elmi araşdırmalar aparmalısan və s. Həvəsim olduğu üçün doktoranturanı da oxudum.

- Bir çox kadrların dilində bu tipli fikirlərə tez-tez rast gəlirik: “Azərbaycanda aldığım magistr təhsili mənə iş mühitində gərək olmur”. Bu təhsil iş prosesində lazım olmurdu?

- Öz ixtisasım üzrə işlədiyimdən universitetdə aldığım təhsili birbaşa istehsalatda tətbiq edə bilirdim. Bu isə təhsili və işi daha maraqlı edirdi. Magistr və doktorantura təhsilinin heç bir köməyi olmadığını deməzdim. Əksinə, yəni çox kömək edirdi. Problemlərin araşdırmasına elmi yanaşma, onları istehsalatda tətbiq edib problemin kökünü tapıb həllinə çalışırdım. Bu cəhətdən çox kömək edirdi. Azərbaycanda aldığım təhsil Almaniyada çalışdığım müddətdə də bir növ özünü göstərirdi. Azərbaycanda təhsilin çox aşağı olduğunu deməzdim. Sadəcə Azərbaycanda tətbiq sahəsi çox azdır və nəzəri bilikləri tətbiq etməyə imkan yoxdur. Almaniyada isə fərqlidir, burda təcrübi hissəyə də çox önəm verirlər.

- “Holcim” kimi böyük şirkətlərə iş üçün müraciət edən kadr çox olur. Onların sizi təkrar dəvət etməkdə israrlı olmaqlarının səbəbi nə idi?

- Böyük şirkətlərə iş üçün müraciət edənlər daha çox olur. Ancaq böyük şirkətlərin tələbləri də böyükdür. Yüksək tələblər qoyurlar və bu tələblərə uyğun gələn işçilər də az olur. Onlar da işçi cəlb etmək baxımından çətinlik çəkirlər. “Holcim Almaniya”nın məni təkrar dəvət etməsinin əsas səbəblərdən biri “Holcim”in Almaniya bölməsində işlədiyim müddətdə təmir sistemi ilə əlaqədar bəzi layihələr həyata keçirməyim və bu sahədə tanınmağım idi. Digər tərəfdən, onların tələblərinə uyğun gələcək işçilər də Almaniyada azdır. Bu baxımdan, qoyulan tələblər də böyük idi və bu tələblərə uyğun işçilər tapılması da o qədər də asan deyildi. Sadəcə mən sistemi bildiyimə və təcrübəm böyük olduğuna görə dəvət etdilər. Təbii ki, yeni işçi götürsələr, onun hazırlanmasına da vaxt lazım idi və bu baxımdan hazır mütəxəssis onlar üçün daha əlverişli hesab olunur. Yəni bunun da təsiri var.

- Böyük şirkətlər kadrı özü dəvət edəndə və ya kadr özü iş üçün müraciət edəndə, onlara təklif etdikləri və digər benfitlər  arasında fərq olurmu?

- Elə bir fərq etmir. Çünki hər şirkətdə hər vəzifənin müəyyən maaş limiti var. Bu vəzifəyə verilən maaşın minimum və maksimumu olur. Maaş bu interval arasında oynaya bilir. Bu da elə böyük fərq eləmir. Ancaq şirkət özü dəvət edəndə, sənin o maksimuma daha yaxın məbləğ almaq şansın çoxdur. Sən şərtlər qoya bilirsən. Bu cəhətdən daha əlverişlidir.

- Təcrübənizdə kiçik şirkətdə çalışmaq olmayıb. Ona görə böyük şirkətlərdə çalışmağın kadra verdiyi üstünlüklərdən danışaq. Böyük şirkətlər hansı imkanları verirlər ki, onlar kiçik şirkətlərdə yoxdur?

- İlk olaraq deyim ki, prespektiv daha çox olur. Çünki irəliləmək üçün iş imkanları genişdir. İşçilərin inkişafı üçün daha çox təlimlər təşkil edilir. İkincisi, işçilərə təklif olunan maaşlar fərqlidir. Üstəlik, maaşdan əlavə müəyyən benefitlər olur. Hətta Almaniyada böyük şirkətdə çalışırsansa, hər hansı bir şirkətlə xidmət almaq üçün müqavilə bağlayırsınızsa, bu zaman sizə güzəşt də edilir. Məsələn, hər hansı bir mobil operatorla müqavilə bağlayırsansa, müəyyən qədər güzəştlər də olunur. Üçüncüsü, böyük şirkətlərdə ən son texnologiyalar tətbiq edilir. Bu da öyrənmək, özünü inkişaf etdirmək cəhətdən səmərəlidir. Dördüncüsü, böyük şirkətlər qarşılarına daha uzunmüddətli hədəflər qoyurlar. İnsan da bir növ buna alışır. Necə ki şirkətin ambisiyaları böyük olur, işçiləri də bir növ o cür tərbiyə edir və öz şəxsi həyatında da bunları tətbiq eləməyə başlayır. Yəni böyük şirkətlərdə işləyənlərin şəxsi həyatda da ambisiyaları böyük olur.

- Rəhbər vəzifəyə gedən şəxs olaraq o təlimlər sizə nə qazandırdı?

- Əgər böyük şirkətdə müxtəlif məsul vəzifədəsənsə, işçilərlə necə davranmağı və rəhbərləri necə davranmağı, idarə etməyi öyrədirlər. Yəni həm öz işçilərini, həm də rəhbərləri idarə etməyi müxtəlif təlimlər vasitəsilə insanlara aşılayırlar. Bu baxımdan insanın dünyagörüşü, baxış bucağı dəyişir. İnsan həyatı, hədəfləri başqa cür görməyi, insanlarla ünsiyyət qurmağın müxtəlif yollarını öyrənir. Məndə bu baxımdan da dəyişikliklər olub.

- Rəhbərləri idarə etmək deyəndə, nə nəzərdə tutulur? Bir misalla izah etsəniz, daha yaxşı olar.

- Bu, bir az kompleks məsələdir. Sən işçiləri idarə etməkdən əlavə, rəhbərlərdən də nə isə əldə etməyi bacarmalısan. Əgər sənə müəyyən işləri görmək üçün büdcə lazımdısa və o iş şirkətə xeyir gətirəcəksə, o büdcəni onlardan ala bilməlisən. Bu, kiçik bir misaldır. Təkcə bu misalla məhdudlaşmır. Rəhbərdən nəyisə istəyəndə, onu almağı bacarmaq və hər hansı məsləyə yaxud problemə baxışını dəyişmək lazım olur. Bunun isə müxtəlif yolları, texnikası var.

- Qlobal şirkətlərdə işə qəbul prosesi uzun olur. Yəqin ki daha yaxşını seçməyə çalışırlar. İş yoldaşı cəhətdən yanaşanda, seçilmiş kadrlarla bir yerdə çalışdığınızı hiss edirsiniz?

- Düzdür, asanlıqla işə götürmürlər. Mən “Amazon”da işə götürülərkən 14 müsahibədən keçmişdim. 10-u onlayn, 4-ü üz-üzə oldu. Müsahibələrdən də keçmək çətindir. Professionalları cəlb edirlər. O da təbii ki, şirkətin inkişafına kömək edir. Milliyətindən asılı olmayaraq öz işinin ustası olanları götürürlər. Din, irq, milliyətə fərq qoyulmur. Başqa hər hansı fərqlilik olduğunu deməzdim. Sadəcə olaraq, hərə öz sahəsində professionaldır. Bunu hiss edirsən.

- Və heç vaxt iş axtarmaq, iş tapmamaq kimi probleminiz olmayıb?

- Qeyd etdiyim kimi təhsil aldığım dönəmdən çalışmağa başlamışam. Bir neçə işə müraciət edib cavab gözləmək təcrübəsi yaşamamışam. Mən bunu təhsillə, işinə məsuliyyətlə yanaşmaqla və dünyagörüşü ilə əlaqələndirirəm. Ona görə, gənc mühəndislərə, iş həyatına yeni başlayan işçilərə məsləhət görərdim ki, öz üzərlərində çalışsınlar. Birinci insan özü nəsə əldə etməlidir, sonra işəgötürəndən nələrsə tələb edə bilər.

- Öz üzərində işləməklə bağlı sizin təcrübəniz necədir?

- Universitetdə oxuduğun vaxt diplom xatirinə yox, doğurdan da nəsə öyrənmək lazımdır. Mən bu cür yanaşırdım. Öz sahənlə bağlı təkcə universitetdə keçirilən dərslərlə kifayətlənmək lazım deyil, əlavə araşdırmalar da vacibdir. İndi belə araşdırmalar üçün daha çox imkan var. Bir də çox mühüm amillərdən biri əlavə dil öyrənməkdir. Dünya qloballaşır, elm və texnologiya çox sürətlə dəyişir və inkişaf edir. Sürətlə dəyişən texnologiyadan və qloballaşmadan geri qalmamaq üçün bir dil kifayət etmir. Əlavə dil bildiyin zaman daha çox məlumat əldə edə bilirsən. Sadəcə çalışmaq və yenilikləri öyrənib tətbiq etmək lazımdır. Heç bir uğur əziyyətsiz əldə olunmur. Uğura gedən yol təbii ki, daha çətin olur. Təbii ki, uğura gedən yolda ailə və mühitin də rolu böyükdür.

Xüsusi olaraq FED.az üçün, Aygün Asimqızı

Banner
Banner

Digər xəbərlər