“Unicapital İnvestisiya Şirkəti” ASC 2024-cü ilin maliyyə göstəricilərinə əsasən, ötən illə müqayisədə illik gəlirini 38% (1 milyon 242 min manat) artıraraq 4 milyon 470 min manata çatdırıb.
FED.az xəbər verir ki, əməliyyat dövriyyəsi bütün strateji biznes istiqamətləri üzrə 34.3 milyard manat təşkil edib (ötən il ilə müqayisədə 76% artım). Müştəri bazası isə rekord göstərici olan 1 milyon 113 min hesab sayına çatıb.
2023-2025-ci illəri əhatə edən strateji plan və qabaqcıl korporativ idarəetmə standartlarına uyğun olaraq, aktiv inkişaf və institusional möhkəmlənmə istiqaməti seçilib. Bu çərçivədə əldə olunan gəlirin əsas hissəsi komplayns, risklərin idarə olunması, korporativ standartların tətbiqi, satış kanallarının genişləndirilməsi və yeni rəqəmsal məhsulların yaradılması kimi prioritet sahələrin inkişafına yönəldilib. Nəticə etibarilə bu istiqamətlər üzrə xərclərdə də artım qeydə alınıb.
2024-cü ilin yekunlarına əsasən, Unicapital-ın xalis mənfəəti ötən il ilə müqayisədə 55% artaraq 346 min manat təşkil edib.
Mövcud biznes istiqamətlərinin genişləndirilməsi, yeni və effektiv biznes sahələrinin yaradılması nəticəsində 2024-cü ildə haqq və komissiya gəlirləri 15% artaraq 2 milyon 712 min manata yüksəlib. Eyni zamanda, qiymətli kağızlarla aparılan əməliyyatlardan əldə olunan xalis mənfəət 104% artım nümayiş etdirərək 487 min manat təşkil edib.
Bütün bu göstəricilər fonunda şirkətin ümumi aktivləri artaraq 20 milyon 802 min manata çatıb.
Qeyd edək ki, “Unicapital İnvestisiya Şirkəti” ASC-nin nizamnamə kapitalı 100% “Unibank” Kommersiya Bankı ASC-yə məxsusdur.
