On ildən artıqdır ki, Bakı Fond Birjasının üzvü kimi fəaliyyətini uğurla davam etdirən "PAŞA Kapital İnvestisiya Şirkəti” QSC anderrayter kimi çıxış etdiyi daha bir emissiyanı uğurla tamamlayıb.

FED.az xəbər verir ki, “AzərGold” QSC tərəfindən buraxılan hər birinin nominal dəyəri 100 (yüz) ABŞ dolları, ümumi buraxlış həcmi isə 20 000 000 (iyirmi milyon) ABŞ dolları həcmində faizli, təmin edilməmiş, sənədsiz, adlı istiqrazların yerləşdirilməsi 29 yanvar 2024-cü il tarixində uğurla başa çatmışdır.

“Bakı Fond Birjası” QSC-nin ticarət platformasında həyata keçirilmiş yerləşdirmədə hərrac zamanı 6 hüquqi və 59 fiziki olmaqla, 65 investor tərəfindən qiymət intervalı 100 (6%) ABŞ dolları və 101.3741 (5.5%) ABŞ dolları olan 68 sifariş təqdim edilib. Sifarişlərin ümumi məbləği 21,521,800.00 ABŞ dolları təşkil etmişdir ki, bu da təklif olunan istiqrazların həcmindən 7.6 faiz çoxdur.

İstiqrazların kəsmə qiyməti 100.0000 (6%) ABŞ dolları, orta ölçülmüş qiyməti isə 100.0433 (5.9841%) ABŞ dolları olaraq müəyyən edilib.   

Qeyd edək ki, hüquqi şəxslər tərəfindən verilmiş sifarişlərin həcmi 9 350 000 ABŞ dolları (43,4 %), fiziki şəxslər tərəfindən verilmiş sifarişlərin həcmi isə 12 171 800 ABŞ dolları (56,6 %) təşkil edib. Xüsusi olaraq vurğulamaq istərdik ki, fiziki şəxslər tərəfindən təqdim edilmiş sifarişlərin həcmi sifarişlərin ümumi emissiya həcminə nisbətinə əsasən yüksək hesab olunur.

Buraxılışın anderrayteri “PAŞA Kapital İnvestisiya Şirkəti” QSC-dir. AzərGold istiqrazları üzrə faiz (kupon) ödənişləri 29 yanvar 2024-cü il tarixindən hesablanmağa başlayacaqdır və ildə dörd dəfə 3 aydan bir ödəniləcəkdir.

Həmçinin qeyd edək ki, bu gün Bakı Fond Birjasında “AzərGold” QSC-nin yeni istiqrazlarının ticarətə buraxılması münasibətilə Açılış Zəngi tədbiri keçirilib. Tədbir zamanı qeyd olunub ki, AzərGold korporativ istiqrazlarının kapital bazarlarına daxil olması ölkənin qiymətli kağızlar bazarının inkişafında əhəmiyyətli bir mərhələ hesab olunur.

PAŞA Kapital İnvestisiya Şirkətinin sədri Ceyhun Hacıyev bildirir ki: "Şirkət istiqrazlarının anderrayteri qismində iştirak edən PAŞA Kapital İnvestisiya Şirkəti fiziki şəxslərin investor kütləsini artırmaqla artıq 10 ildən çoxdur ki, bu istiqamətdə bir sıra böyük layihələri uğurla həyata keçirir. Əlavə olaraq da vurğulamaq istərdim ki, PAŞA Kapital, bundan sonrakı dövrdə də bu kimi layihələrdə aktiv iştirakını davam etdirəcək".