Ötən həftənin sonu İPO edən «SpaceX» kosmik şirkətinin səhmləri IPO-dan qısa müddət sonra sürətlə bahalaşıb və nəticədə «SpaceX» dünyanın dördüncü ən böyük səhmdar şirkətinə çevrilib. 

FED.az xəbər verir ki, səhmləri 17%-ə qədər bahalaşan «SpaceX» rekord qıran ilkin kütləvi təklifindən bəri qazancını davam etdirir. 

Nəticədə Elon Musk-ın raket və süni intellekt şirkətinin bazar kapitallaşmasını təxminən 3 trilyon dollara çatdırdı. Bu artımla «SpaceX» hazırda «Amazon»-dan təxminən 300 milyard dollar, «Microsoft»dan isə təxminən 20 milyard dollar daha dəyərlidir.

«Vanda Research» şirkətinin məlumatına görə, bahalaşmanın əsas hərəkətverici qüvvəsi pərakəndə investorlar olub, onlar ilk iki ticarət günündə ötən həftə bütün ABŞ fond bazarında alınan ümumi məbləğə bərabər miqdarda «SpaceX» səhmlərini alıblar.

Vanda şirkəti yazır: «Hazırda pərakəndə investorların diqqət yetirdiyi yalnız bir səhm var... SpaceX. Pərakəndə investorlar başqa yerlərdə nisbətən ehtiyatlı olsalar da, kapitallarını bu şirkətə yönəltməkdədirlər».

Xatırladaq ki, ötən həftə İPO-ya çıxandan sonra SpaceX-in səhmləri investorların gözləntilərini artıqlamasıyla doğruldub.

Belə ki, iyunun 12-də birjaya çıxanda SpaceX-in səhmlərinin qiyməti 135 dollar olsa da, birjaya 160 dollardan çıxıb, ötən 3 gün ərzində isə 60% bahalaşaraq 215 dollara yüksəlib.

Sonradan qiymətlər 202 dollara enib, amma bu da birjaya çıxış qiymətindən 40 dollar və ya 40% artıqdır.