Çərşənbə axşamı Almaniyada və Avrozonada ÜDM göstəricilərinin dərc olunması ərəfəsində dollar major valyutalar qarşısında bir qədər bahalaşır. EUR/USD, GBP/USD və USD/JPY valyuta cütlükləri müvafiq olaraq 1.0820, 1.2848 və 154.660 səviyyələrində ticarət olunurlar. Dollar indeksi (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 0.03% artaraq 104.59 bənd təşkil edib.
Yaponiyanın Daxili İşlər və Rabitə Nazirliyinin statistika bürosunun məlumatına əsasən, ölkədə mövsümi düzəlişlər nəzərə alınmaqla işsizlik səviyyəsi may ayı ilə müqayisədə iyun ayında 2.6%-dən 2.5%-ə qədər enib. Analitiklər göstəricinin 2.6% səviyyəsində qalacağını proqnoz edirdilər.
İyun ayında ölkədə işsizlərin sayı 1.81 milyon nəfər təşkil edib ki, bu da ötən il ilə müqayisədə 20 min nəfər (1.1%) çoxdur. Yaponiya əhalisinin işləməyən hissəsi, o cümlədən 65 yaşdan yuxarı insanlar, illik müqayisədə 650 min nəfər (1.6%) azalaraq 39.91 milyon nəfər təşkil edib.
Həmçinin bugün ABŞ-da statistik göstəricilərin açıqlanması ərəfəsində qızılın qiyməti yüksəlir. Nyu-Yorkun “Comex” birjasında qızılın dekabr ayı üzrə fyuçerslərinin qiyməti 6.45$ və ya 0.27% artaraq 1 troy unsiyası üçün 2431.95$-a qədər yüksəlib. Qızılın spot qiyməti isə 2388$ təşkil edir.
Bugün Almaniyada dərc olunacaq inflyasiyaya dair göstəricilər investorların diqqət mərkəzində olacaq. Belə ki, analitiklərin fikrincə, ölkədə iyul ayında illik inflyasiya, ilkin hesablamalara görə, iyun ayında olduğu kimi 2.2% təşkil edib. Ölkənin Federal Statistika Bürosu (Destatis) müvafiq məlumatları Bakı vaxtı ilə saat 16:00-da dərc edəcək.
Eləcə də, “Destatis” Almaniya ÜDM-i ilə bağlı məlumatları dərc edəcək. Analitiklər hesab edirlər ki, 2024-cü ilin ikinci rübündə göstərici illik ifadədə dəyişməz qalıb, rüblük ifadədə isə 0.1% artıb.
Avropa statistika agentliyi “Eurostat” ikinci rüb üzrə Avrozonanın ÜDM dinamikasının ilkin qiymətləndirməsini dərc edəcək. Ekspertlər ÜDM-in illik ifadədə 0.6%, rüblük ifadədə isə 0.2% artdığını ehtimal edirlər.
Bakı vaxtı ilə saat 18:00-da “Conference Board” analitik şirkəti ABŞ-da İstehlakçı İnamı İndeksini dərc edəcək.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
