Çərşənbə axşamı qlobal bazarlarda qızılın qiyməti rekord səviyyəyə yüksələrək bahalaşmasını davam etdirib. Buna səbəb "təhlükəsiz sığınacaq" aktivlərinə tələbin ABŞ ilə Venesuela arasında artan geosiyasi gərginlik fonunda güclənməsi olub.
FED.az xəbər verir ki, ilin sonu tətilləri ilə əlaqədar olaraq ticarət həcmlərinin zəif olması qızıl və digər qiymətli metallar üzrə qiymət hərəkətlərini daha da kəskinləşdirib. Bazar ertəsi qızıl və gümüş rekord səviyyələrə çatıb, platin və palladium isə çoxillik maksimumları yeniləyib.
Qızılın unsiyasının qiyməti 1% artımla 4484,02 dollar səviyyəsində ticarət olunub. Gün ərzində qiymət 4497,82 dolları da görərək, rekord həddə yüksəlib.
Fevral ayı üzrə qızıl fyuçersləri isə 1,3% bahalaşaraq unsiyası 4530,30 dollarla pik səviyyəyə çatıb.
ABŞ–Venesuela gərginliyi təhlükəsiz "sığınacaq tələbatını" artırır
Qızıl və digər qiymətli metallara olan "təhlükəsiz sığınacaq" yönümlü tələbat ABŞ ilə Venesuela arasında gərginliyin artması fonunda yüksəlib. ABŞ Hərbi Dəniz Qüvvələrinin Cənubi Amerika ölkəsi ilə əlaqəli üçüncü bir neft tankerini ələ keçirməyə cəhd göstərməsi bu gərginliyi daha da artırıb.
ABŞ Prezident Donalda Tramp Venesuela Prezident Nikolas Maduro əleyhinə ritorikasını davam etdirərək mümkün dəniz hücumu ilə bağlı xəbərdarlıq edib. Tramp həmçinin Venesuela sahilləri yaxınlığında ələ keçirilən Çin tankerindəki neftin ABŞ tərəfindən saxlanılacağını bildirib.
Digər tərəfdən, İranın raket təlimləri keçirməsi də Yaxın Şərqdə gərginliyi artırıb. Xüsusilə İsrailin Tehrana qarşı mümkün yeni zərbələr barədə Vaşinqtonu məlumatlandırmağı planlaşdırdığına dair xəbərlər bu gərginliyi daha da gücləndirib.
FED-in faizlərə daha da aşağı salacağı gözləntiləri qızılı dəstəkləyir
ABŞ-da inflyasiyanın zəifləməsi ilə bağlı mənzərə də qızılın bahalaşmasını dəstəkləyib. Keçən həftə açıqlanan ABŞ istehlak qiymətləri indeksi (inflyasiya göstəricisi) gözləntilərdən aşağı olub və bu, bazarların Federal Ehtiyat Sisteminin (FED) 2026-cı ildə iqtisadiyyatı dəstəkləmək üçün bir neçə faiz endirimi edəcəyi ilə bağlı gözləntilərini gücləndirib.
Faiz dərəcələrinin aşağı olacağına dair gözləntilər qızılı faiz gətirən aktivlərlə müqayisədə daha cəlbedici edir.
ABŞ dollarının zəifləməsi və Xəzinədarlıq istiqrazlarının gəlirliliyinin aşağı səviyyədə qalması da qızılın möhkəmlənməsinə töhfə verib. İlin sonuna təsadüf edən zəif ticarət şəraitində bu amillər qiymət hərəkətlərini gücləndirib və investorlar bayramlar ərəfəsində portfellərini daha müdafiə xarakterli mövqelərə yönəldiblər.
Gümüş və digər qiymətli metallar da qızılın yüksəlişini təkrarlayaraq yeni maksimumlara çatıb.
Gümüşün qiyməti 1%-dən çox artaraq unsiya üzrə 69,982 dollarla yeni rekord səviyyəyə yüksəlib. Platin isə 2,5% bahalaşaraq unsiyası 2 185,78 dollara çatıb və 17 ildən artıq müddətin ən yüksək səviyyəsində qalıb.
Palladiumun qiyməti 3%-dən çox artaraq unsiyası 1830,57 dollar olub.
London Metal Birjasında etalon mis fyuçersləri bir ton üçün 11 mib 918,25 dollar səviyyəsində sabit qalıb, ABŞ-da mis fyuçersləri isə bir funt üçün 5,50 dollar səviyyəsində qalaraq dəyişməyib. (Marja)
