“Azərbaycanda kapital bazarının inkişafı digər qonşu ölkələrlə müqayisədə aşağıdır. Xüsusən də bu göstərici özünü riteyl bazarda hiss etdirir. Növbəti 4 ildə korporativ iqstiqrazların emissiya həcmi 4-5 dəfə artırılmalıdır”. Bu sözləri Bakıda keçirilmiş III Maliyyə və İnvestisiya Forumunda “PAŞA Kapital İnvestisiya Şirkəti” QSC-nin direktor müavini Ruslan Xəlilov bildirib.
Onun sözlərinə görə, 2020-ci illə müqayisədə 2021-ci ildə emissiya olunmuş istiqrazların həcmi ÜDM-də payı 0,9% həcmində müəyyənləşib ki, bunun da 0,5% i ipoteka qiymətli kağızların payına düşüb. Qardaş Türkiyədə bu göstərici 3,9%, Qazaxıstanda 3,5% təşkil edib. Azərbaycan üzrə bu göstəricilər qonşu ölkələrlə müqayisədə aşağıdır.
Ruslan Xəlilovun sözlərinə görə, son bir il ərzində dövlət qiymətli kağızların emissiyasında azalama müşahidə olunur: “2021-ci illə daxili bazarda dövlət istiqrazlarından cəlb olunan vəsaitlərin həcmi 2 miyard təşkil edirdisə, cari ilin əvvəlindən indiyədək bu kimi vəsaitlərin həcmi 1,5 milyard manat olub. Zaman keçdikcə dövlət qiymətli kağızların emissiyası azalmalı, özəl sektor iştirakçıları üçün korporativ istiqraz emissiyasının həcmi artırılmalıdır".
Xatırldaq ki, "PAŞA Kapital İnvestisiya Şirkəti" QSC 2012-ci ilin iyun ayında yaradılmışdır. Şirkət müştərilərə bütün növ investisiya xidmətlərinin göstərilməsini təmin edir.
