PAŞA Kapital İnvestisiya Şirkəti QSC tərəfindən Bakı Fond Birjasında "PASHA Yatırım Bankası” A.Ş-nin sənədsiz, adlı, faizli, təmin edilməmiş istiqrazları yerləşdiriləcəkdir.
FED.az xəbər verir ki, yerləşdiriləcək istiqrazların hər birinin nominal dəyəri 1000 ABŞ dolları, ümumi həcmi 25 000 000 ABŞ dolları təşkil edir. Qiymətli kağızların əsas anderrayteri qismində isə Azərbaycanın kapital bazarında fəaliyyət göstərən şirkətlər sırasında ən böyük dövriyyəyə malik olan “PAŞA Kapital İnvestisiya Şirkəti” QSC çıxış edir.
Tədavül müddəti 18 ay olan bu istiqrazlar investorlara illik 6,19% gəlirlilik təmin edəcək.
İstiqrazların faiz ödənişindən Türkiyə Respublikasının qanunvericiliyinə əsasən 3% ödəmə mənbəyində vergi (ÖMV) tutulacaqdır. Əlavə olaraq isə fiziki şəxslərə ödəniləcək faiz ödənişindən yerli qanunvericiliyə əsasən 10% ödəmə mənbəyində vergi (ÖMV) tutulacaqdır. Belə ki, hüquqi şəxslərin gəliri 6.00%, fiziki şəxslərin gəliri 5.40% təşkil edəcəkdir.
Kupon faizlərinin ödəniş müddəti isə ildə günlərin sayı 360 və bir ayda günlərin sayı 30 gün olaraq götürülməklə, 90 gündən bir həyata keçiriləcəkdir. Qeyd edək ki, 15-29 may 2024-cü il tarixləri aralığında Bakı Fond Birjasında "PASHA Yatırım Bankası” istiqrazları üzrə abunə yazılışı baş tutacaq. Yerləşdirmə isə 30 may 2024-cü il tarixinə təyin edilib.
