ABŞ-da çərşənbə günü əsas ticarət sessiyası başa çatdıqdan sonra Nvidia səhmlərində satışlar yenidən güclənib. Buna “The Wall Street Journal”ın şirkətin direktorlar şurasının baş direktor Censen Huanqı vəzifədən uzaqlaşdırmağa hazırlaşdığı barədə xəbəri təkan verib. Nvidia-dakı geriləmə Nasdaq-100 fyuçerslərini də aşağı çəkib.
“Forbes”: “Nvidia” rəhbəri bir gündə 7,4 milyard dollar itirib
FED.az xəbər verir ki, Nasdaq-100 fyuçersləri 0,8 faiz, S&P 500 fyuçersləri isə 0,4 faiz geriləyib. Dow Jones Industrial Average fyuçersləri cüzi dəyişib.
“The New York Times” Huanqın Nvidia-nın rəhbər heyətindən bir şəxslə nikahdankənar münasibətdə olduğu barədə məlumat yayıb. “The Wall Street Journal” isə direktorlar şurasının Huanqı vəzifədən uzaqlaşdırmağa hazırlaşdığını yazıb. Nvidia səhmlərinin qiyməti sessiyadan sonrakı ticarətdə 9 faizə yaxın da ucuzlaşıb.
Uoll-Strit sessiyanı yüksəlişlə bağlamışdı
Çərşənbə günü əsas ticarət sessiyasında Dow Jones indeksi 255 bəndə yaxın, yaxud 0,5 faiz yüksəlib. S&P 500 indeksi 1,3 faiz, Nasdaq Composite isə 1,6 faiz artıb. Yüksəlişə CoreWeave səhmlərinin maliyyə nəticələrindən sonra bahalaşması və Nvidia səhmlərinin sessiya ərzində bərpası təkan verib.
CoreWeave-in gözləntiləri üstələyən nəticələri və gəlir proqnozunu yüksəltməsi süni intellekt sektorunun uzunmüddətli artımına inamı gücləndirib. İnvestorlar isə Nvidia səhmlərindəki son zəiflik fonunda süni intellektin dəstəklədiyi birja yüksəlişinin davam edib-etməyəcəyini qiymətləndirirlər.
Wells Fargo Investment Institute-un qlobal səhmlər və real aktivlər üzrə rəhbəri Samir Samananın fikrincə, Anthropic-in gözlənilən ilkin kütləvi səhm təklifi (IPO) süni intellektə investor marağını artıra bilər. Bununla belə, inflyasiyanın yüksək qalması, FED-in faiz dərəcələrini yenidən artırması ehtimalı, uzunmüddətli faizlərin yüksəlməsi, Vaşinqtondakı siyasi dəyişikliklər və süni intellektlə məlumat mərkəzlərinin tənzimlənməsi bazardakı bərpaya ehtiyatla yanaşmaq üçün əsas verir.
Plancorp-un investisiya strategiyası üzrə direktoru Kelli Koks bildirib ki, süni intellektə dair nikbin gözləntilərlə faiz və inflyasiya narahatlıqları arasındakı gərginlik investor əhvalına təsir göstərməkdə davam edə bilər.
Cümə axşamı investorların diqqəti ABŞ-ın iki iqtisadi göstəricisinə yönələcək. İşsizlik müavinəti üçün ilkin müraciətlərin sayı Bakı vaxtı ilə saat 17:30-da, təkrar mənzil bazarında satış göstəriciləri isə saat 19:00-da açıqlanacaq.
Asiya birjalarında qarışıq dinamika
Cümə axşamı Yaponiyanın Nikkei 225 indeksi dalğalı ticarətdə cüzi yüksəlib, daha geniş Topix indeksi isə 0,62 faiz artıb. Nvidia-nın təchizatçıları Samsung və SK Hynix-in böyük çəkiyə malik olduğu Cənubi Koreyanın Kospi indeksi 0,35 faiz, kiçik kapitallaşmalı şirkətləri əhatə edən Kosdaq isə 0,66 faiz geriləyib.
Honkonqun Hang Seng indeksi 1,03 faiz, Avstraliyanın S&P/ASX 200 indeksi 0,31 faiz düşüb. Çinin CSI 300 indeksi cüzi dəyişib.
