Dünyanın bank sektorunda böhran narahatlığı, bəzi bankların səhmlərinin ucuzlaşması və investorların ənənəvi alətlərlə bağlı ehtiyatlı davranması ehtiyat variantlarına – qızıla və kriptovalyutalara marağı artırıb.
FED.az xəbər verir ki, son günlər kriptovalyuta bazarında qiymətlər kəskin artmaqdadır.
Əsas kriptovalyuta olan Bitkoin son bir həftədə 28% bahalaşaraq 28 min dollarlıq həddi də keçib.
Ümumilikdə son 3 aya yaxın müddətdə bitkoin 12 min dollara yaxın və ya 70% bahalaşıb. Belə ki, 2022-ci ilin sonunda bitkoinin qiyməti 16,5 min dollar idi, indi isə qiymət 28,2 min dollar olub.
Təkcə son 10 gündə isə bitkoin 8 min dollar bahalaşıb – martın 10-da qiymət 19 995 dollar idi.
Bitkoin kimi olmasa da digər məşhur kriptovalyuta – «Etherium» da bahalaşır. Son bir həftədə 13% artımdan sonra qiymətlər 1784 dollar ətrafındadır. 2022-ci ilin dekabrın sonunda isə qiymət heç 1200 dollarda deyildi – 1198 dollar, o vaxtdan bəri «Etherium» 600 dollar və ya 49% bahalaşıb. Bu müddətdə heç bir alət belə gəlirli olmayıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür
