Bakı Fond Birjası bu ilin yanvar-avqust ayları üzrə Azərbaycanda fəaliyyət göstərən investisiya şirkətlərinin əməliyyat sayında ən çox artım olan şirkətlərin adlarını açıqlayıb.
FED.az xəbər verir ki, illik müqayisədə əməliyyat sayında ən kəskin artım "Troni İnvestisiya Şirkəti" QSC-də qeydə alınıb. Şirkətin əməliyyatlarının sayı 480,3 dəfə və ya 4 316 vahid artıb.
Siyahıda növbəti yerdə "ABB İnvest İnvestisiya Şirkəti" QSC-dir. Şirkətin əməliyyat sayı 9,5 dəfə və ya 15 436 ədəd yüksəlib ki, bu da mütləq rəqəmlə ən böyük artım deməkdir.
Capital Partners İnvestisiya Şirkəti QSC də əməliyyat sayını 4,8 dəfə və ya 918 vahid artırıb. "Xalq Kapital İnvestisiya Şirkəti" QSC (51,4%), "Unicapital İnvestisiya Şirkəti" ASC (43,4 %), "Assist Finance İnvestisiya" ASC (4,2%) və "PAŞA Kapital İnvestisiya Şirkəti" QSC (28,2%) müsbət dinamika nümayiş etdirən digər şirkətlər olub.
Əməliyyat sayında azalma olan şirkətlər
Əməliyyat sayında ən kəskin azalma isə "CFI Financial İnvestisiya Şirkəti" QSC-də baş verib. Şirkətin əməliyyatlarının sayı 17,7 dəfə və ya 1,338 vahid azalıb.
"MFX Trading İnvestisiya Şirkəti"-nin əməliyyat sayı 19,4 dəfə (1 542 vahid), "Invest-Az İnvestisiya Şirkəti" QSC-nin sayı isə 3,7 dəfə (142 vahid) azalıb. "CPM-İnvest İnvestisiya Şirkəti" QSC (-30%) və "PSG Kapital İnvestisiya Şirkəti" QSC (-10,1%) azalma ilə üzləşiblər.
