Tesla-nın İdarə Heyətinin sədri Robyn Denholm bir daha səhmdarlara müraciət edərək, şirkətin baş direktoru Elon Musk (İlon Mask) üçün nəzərdə tutulan misilsiz ödəniş paketini təsdiqləməyə çağırıb. Bu paket şirkətə 1 trilyon dollara başa gələ bilər və Maskın şirkətdən ayrılması riski ilə müşayiət olunur.
Tesla-nın satışlarında - REKORD
FED.az xəbər verir ki, Denholm-un bazar ertəsi səhər səhmdarlara göndərdiyi məktub (keçən həftə göndərilən məktubun ardınca) xəbərdarlıq edir ki, əgər səhmdarlar planı təsdiqləməsələr, Tesla Maskın liderliyini itirə bilər. Sentyabrın əvvəlində açıqlanan təklifə əsasən, Maska 12 böyük səhm opsionu paketi veriləcək və bunlar şirkətin İdarə Heyəti tərəfindən “çətin və iddialı” hesab edilən məqsədlərlə əlaqələndiriləcək.
Denholm məktubunda yazıb:
“Əgər biz İlonu ədalətli və nəticəyə əsaslanan ödəniş planı ilə böyük işlərə ruhlandıra bilməsək, onun rəhbər vəzifədən ayrılması riski yaranacaq. Tesla onun vaxtını, istedadını və vizyonunu itirə bilər, bunlar isə indiyə qədər səhmdarlara qeyri-adi gəlirlər qazandıran əsas amillər olub.”
O bildirib ki, Maskın rəhbərliyi olmadan Tesla mühüm dəyər itkisinə məruz qala bilər, çünki onun rolu avtomobil, robototexnika, enerji saxlama və avtonom idarəetmə sahələrində həlledici əhəmiyyət daşıyır.
Bazar ertəsi Tesla-nın səhmləri ümumi bazar artımı fonunda 4%-dən çox bahalaşıb.
Musk və Denholm bildirirlər ki, həm əvvəlki, həm də yeni “kompensasiya planları” əslində Musk-ı Tesla-da saxlamaq və şirkətin uğuruna marağını qorumaq məqsədi daşıyır. Musk-ın öz səhm paketlərini ən azı 7,5 il müddətində sata bilməyəcəyi və tam mükafatı qazana bilməsi üçün çox iddialı məqsədlərə çatmalı olduğu vurğulanır. Bu hədəflərə aşağıdakılar daxildir:
-Tesla-nın EBITDA-sını 400 milyard dollara çatdırmaq (şirkətin ötənilki göstəricisi 16,6 milyard dollar olub);
- Bazar dəyərini 8,5 trilyon dollara yüksəltmək (hal-hazırda Tesla-nın bazar dəyəri təxminən 1,44 trilyon dollardır). (Marja)
