Böyük Britaniyanın iri qlobal maliyyə xidmətləri şirkəti HSBC, geosiyasi risklərin davam etməsi, qlobal miqyasda artan dövlət borcu və investorların təhlükəsiz aktivlərə yönəlməsi səbəbindən qızılın qiymətinin 2026-cı ilin ilk yarısında 1 unsiya üçün 5 min dollara qədər yüksələ biləcəyini proqnozlaşdırır. Lakin bank xəbərdarlıq edib ki, bu güclü bahalaşmadan sonra ucuzlaşma riski də nəzərə alınmalıdır.
«Mən əmin idim ki, qızıl bahalaşacaq və qiymət kəllə-çarxa çıxdı - 10 MİLYARD DOLLAR QAZANDIQ»
Qısamüddətli dövrdə bahalaşma və kiçik qiymət düşməsi
FED.az xəbər verir ki, HSBC, mümkün qiymət yüksəlişlərinə baxmayaraq, 2026-cı il üçün qızılın qiyməti üzrə orta qiymət proqnozunu cüzi bir düzəlişlə 4600 dollardan 4587 dollara endirib. Bank qeyd edib ki, güclü "rallilər" adətən düzəliş riskini də (qiymətlərin geriləməsini) özü ilə gətirir.
FED və geosiyasi risklər həlledici olacaq
Hesabatda geosiyasi gərginliklərin azalması və ya ABŞ Mərkəzi Bankı (FED) faiz endirim dövrünü dayandırması halında qızılın yüksəliş tempinin zəifləyə biləcəyi barədə xəbərdarlıq edilib. HSBC, bu qeyri-müəyyənliklər səbəbilə 2026-cı il üçün 3950 – 5050 dollar arasında geniş bir qiymət aralığı proqnozlaşdırır.
Ortamüddətli və uzunmüddətli dövrdə bahalaşacaq
Qısamüddətli risklərə baxmayaraq, HSBC qızılın qiyməti barədə ortamüddətli və uzunmüddətli proqnozlarını yuxarı yönlü olaraq yeniləyib. Bank bildirib ki, struktur amillər – yüksək borclanma, geosiyasi həssaslıqlar və rezerv diversifikasiyası – qızıl tələbinə dəstək verməyə davam edəcək.
Bu çərçivədə HSBC:
2027-ci il üzrə orta qiymət proqnozu: 3950 dollardan 4625 dollara,
2028-ci il üzrə orta qiymət proqnozu: 3630 dollardan 4700 dollara,
2029-cu il üçün isə ilk dəfə 4775 dollar orta hesabla qiymət proqnozu açıqlayıb.
HSBC hesabatında qeyd edib ki, qısamüddətli dalğalanmalara baxmayaraq, qızıl qlobal qeyri-müəyyənlik şəraitində strateji təhlükəsiz aktiv olaraq qalacaq və uzunmüddətdə investor portfellərindəki əhəmiyyətini qoruyacaq.
