Qlobal bank və maliyyə xidmətləri şirkəti "Bank of America"nın (BofA) texniki analitikləri qızılın ilin əvvəlindən bəri davam edən korreksiyasının (qiymətinin düşməsinin) daha böyük miqyasda davam edə biləcəyi barədə xəbərdarlıq ediblər.
Qızıl və gümüş ucuzlaşıb - SON QİYMƏT
FED.az xəbər verir ki, Bank analoji vəziyyəti, qızılın, 1980 və 2011-ci illərdə qeydə alınmış yüksək səviyyələrdən sonra baş verən kəskin “ayı bazarları” ilə (ucuzlaşma) müqayisə edib.
BofA mərhələli alış strategiyası təqdim edib. Bu strategiyaya əsasən, investorların geniş qızıl alışlarına başlamaları yalnız qiymətlərin 3450–3250 dollar intervalına enməsindən sonra məqsədəuyğun hesab olunur.
BofA texniki təhlil hesabatında uzunmüddətli eniş riskini artıran bir neçə neqativ siqnalın eyni vaxtda meydana çıxdığını bildirib. Bunlara “ölüm kəsişməsi” modelinin formalaşması, xalis uzun mövqelərin yüksək səviyyəsi, "təhlükəli zirvə şamı," TD Sequential indikatorunun tükənmə siqnalı və qızılın son maksimumunda Nisbi Güc İndeksinin (RSI) 90 səviyyəsinə çatması daxildir.
Bankın məlumatına görə, RSI-nin 90 səviyyəsinə yüksəlməsi 1980 və 2011-ci illərdə qeydə alınmış yüksək səviyyələr zamanı müşahidə edilən göstəricilərlə uyğunluq təşkil edir.
XAU/USD cütlüyünün qiyməti ilin əvvəlindən bəri 7,8 faiz azalıb. 2026-cı ilin ən yüksək səviyyəsindən isə ucuzlaşmaı 29 faizə yaxınlaşıb. Bakı vaxtı ilə saat 08:30-da qlobal bazarlarda qızıl 3985 dollara ticarət olunub.
2026-cı ilin ən yüksək səviyyəsi: 5608,35 dollar/unsiya
17 iyul qiyməti: 3985,20 dollar/unsiya
Ucuzlaşma: 1623,15 dollar və ya 28,9%
BofA kifayət qədər sərt tarixi müqayisə də təqdim edib. Bankın məlumatına görə, 1970-ci ildən bu yana qızıl bazarında qeydə alınmış üç “ayı bazarı”nın hər birində qiymətlər əvvəlki yüksəlişin ən azı 50 faizini geri verib. BofA-nın hesablamalarına əsasən, qızılın qiymətinin 2026-cı ilin əvvəlində qeydə alınmış ən yüksək səviyyədən 3315 dollara qədər enməsi riski mövcuddur.
BofA hesab edir ki, hazırkı korreksiya (ucuzlaşma) daha uzunmüddətli “ayı bazarı”nın başlanğıcı olarsa, 2026-cı ilin ikinci yarısında qızıl daha ciddi təzyiqlə üzləşə bilər.
